股海實戰：零售股 可小注短炒

上周美國經濟數據同美股表現都唔多好，偏偏內地A股苦撐，到咗上周五A股更藉月底或重啟RQFII同MSCI研究將A股納入系列指數嘅消息而炒上，恒指亦急彈逾500點，臨尾市抽穿22,000點關，大量冚倉盤帶動下，臨收市前十五分鐘現貨成交急增100億元，結果埋單恒指收報22,013點，升501點，成交661億元，好友呢仗贏得漂亮！

有關MSCI研究將A股納入其系列指數嘅消息，早喺去年末季經已喺市場流傳。執筆時聽到中證監證實確與MSCI就相關事宜接觸，但就未見有時間表。聽芬佬講，由於呢件事需要匯率管制、財稅及監管事宜等多方面作配合，故相信最快冇一兩年都難成事。

季度部署容後檢討

上周五A股急升，相信同撞啱A股期指結算都有啲關係。本來，若然真係純粹挾淡倉，本周恒指應該會疲態畢現，咁嘅話阿莊會維持次季尚未見低位嘅睇法，嚟緊股份會繼續個別發展。之但係，咁啱「五．一」長假將至，會唔會係阿爺有心托住股市，等長假消費氣氛不致太差，就真係難講。總而言之，若然恒指以大成交挾穿大位22,300至22,400點，且成交持續回升，咁就要重新檢討季度策略部署。

上周五市場另一個傳聞係，短期內人行將宣布擴闊人民幣匯率浮動區間，意味嚟緊匯率波動將進一步加劇。阿莊聽到有股友最近收到投行銷售員推介新產品──人仔衍生工具，以博人仔升值，入場費10萬美金，年期一年。老實講，近期人仔係咁升，投行呢個時候積極向散戶推銷產品，過往經驗顯示多半係散貨格，咁講法，對嚟緊人仔同A股表現都應該有啲保留。

講番個股，重磅中資股一下子狂挾一大棍，依家追貨真係好尷尬，各位要執生！睇番啲同指數走勢冇大直接關係嘅股份，下周三又係一年一度嘅五一黃金周、表叔們訪港嘅旺季，可以提早留意吓啲本地零售股，其中化妝品零售商莎莎（00178）可以望多兩眼。

莎莎一向係基金愛股，皆因近幾年盈利年年增，且派息比率高。今年以來政府針對樓市推出辣招，樓價止升，商舖租金亦見回穩，對莎莎呢類大型連鎖零售商應該係好事。再睇莎莎股價自上月見高位8.66元後便反覆回落，本月跌至7元現承接，現價往績市盈率回落至28倍，息率2.6厘。技術上，近月走勢轉弱係事實，但短線藉五一效應作出反彈嘅可能性不能完全抹煞，企穩7元關，可小注一試，博上試50日線阻力位7.7元，跌穿6.8元止蝕。