樓市出更：勿地臣街 加租倍倍聲

近年銅鑼灣核心消費街愈來愈大，就以勿地臣街為例，由於地理上得天獨厚，靠近區內地標時代廣場，所以近幾年吸引好多時裝店等搶灘進駐，澳洲雪靴店都喺度開旗艦店，部分昔日小本經營嘅舊式麵包店及中藥店早已絕迹。勿地臣街舖位業主普遍都順勢加租兼揀客，一個面積約1,000方呎嘅地舖，依家叫租每月30幾萬元，加幅閒閒哋一倍，升幅並不比同區羅素街遜色。

依家勿地臣街地舖數目約30幾間，單號數個段主要係潮流時裝店，雙號數就以麵包、快餐店同埋地道食店為主，靠近利舞臺同時代廣場嘅一段店舖租戶，有內地旅客最鍾意嘅錶行、藥房同潮流飾品等舖頭。有位來自吉林省長春市的劉小姐同劉Sir講，勿地臣街咁近港鐵站，所以嚟銅鑼灣都會順道逛逛。有物業代理話，呢段勿地臣街舖目前平均呎租大約300幾元。

老店絕迹 吉舖湧現

至於勿地臣街單號數一段，有個同耀華街交界單邊地下，連同1至3樓巨舖，最近畀澳洲雪靴專門店UGG租咗，聽講個舖面積加埋近6,000方呎，以市值月租約100萬元計，呎租大概160幾元，比起Bauhaus之前月租多逾1.7倍。

事實上，該街道單號數一段原先有唔少本地時裝店，但奈何業主狂加租，部分租戶計過數後，認為搵埋唔夠畀租，所以相繼遷出，家陣條街罕有出現多達4個吉舖，其中有個單號交吉地舖，面積約800方呎，原由本地時裝店租用，業主依家嗌緊每月約25萬元，呎租約310元，加幅達1.5倍。

雙號數一段年幾前仲有餅店及麵包快餐店等老舖，依家超過一半變成時裝、飾品及新潮食肆等店舖。英皇國際（00163）執行董事張炳強話，集團去年中以約1.46億元購入勿地臣街12號地舖（禮頓麵包舊址），早排有幾個客洽租，月租約35萬元，現正揀選合適租戶。

專賣店自己舖唔急搬

面對勿地臣街商戶逐步「變面」，老店經營更困難，喺條街一間牛肉專賣店工作嘅古先生話，間舖已經營近半世紀，慶幸係老闆自置物業，加上公司生意唔錯，相信短時間唔會選擇遷出。