Fundman睇市：水泥股 有機炒落後

反地心吸力一段日子的美股，前晚終於回吐。美國銀行業績麻麻，拖累金融板塊，再加上彰顯美國國力的蘋果公司，股價前晚急挫跌穿400美元，大大影響市場氣氛，美股三大指數急跌。

七個月前，蘋果股價創過697.8美元新高，市值達6,550億美元（約5.1萬億港元），登上最大市值公司寶座，估唔到半年多啲，市值已蒸發超過四成。蘋果被大孖沙遺棄，表面解讀，係前晚券商Piper Jaffray分析師Gene Munster份報告，預測九月發布會上，蘋果將推出低價智慧手機，搶本身高檔iPhone生意，最壞打算係流失三分之一的高端用戶。此外，有供應鏈消息話零部件訂單顯示，蘋果iPad mini本季出貨量會遠差過市場估計，可能要跌兩至三成。蘋果今年PE9.1倍，估值一啲都唔貴，無奈投資市場寸土必爭，以致不受歡迎的，就係增長放緩故事。

港股未能擺脫弱勢

港股擺脫唔到弱勢，出現五連跌，恒指再插57點，報21,512點，成交縮到得544億，升跌股份數目六四比，反映市場買賣兩閒，資金極具選擇性。走勢較佳有家電股、REITs、內房股及紡織股。早市商務部公布，三月外商直接投資（FDI）為124.21億美元，按年升5.65%，比分析員估計的1.9%高近三倍，亦係去年六月後，連續兩個月出現正數，外商重回內地投資的興趣回升，滬綜指升3點，報2,197點。

中國公布新國五條出台前，三月份70個大中城市新建住宅售價，按年升幅擴大到3.6%，上漲城市有68個。查實多年經濟高速增長，民間滾存的財富無太多出路，唔少人對股市死心，結果中央調控房價愈調愈升，睇嚟國五條最多只能減慢樓市上升速度。

內房股外，近期多間大行都積極向客戶推介水泥股，一來見樓市冇畀國五條一招KO，加上商品房的需求，及三月傳統需求回升，水泥價同首季比較有唔錯升幅。另外，市場消息話中國城鎮化工作會議，短期會進入實質啟動階段，都有利水泥股，有機會繼內房之後，出現炒落後的情況。龍頭股海螺（00914）廿二日會出季度業績，估計按年會跌15%，不過第二季基建需求帶動下，大行估毛利率及銷售量都會由首季低位反彈。股價個半月以來首次企穩50日線樓上收市，短線技術走勢較可取，值得留意。