股海實戰：風電股 追唔過

市場憧憬中央出招維穩，內地股市微升收場，恒指則反覆偏軟，成交僅546億元，難怪最近約專門服務對沖基金嘅交易員食飯吹水，過去都要滾水淥腳走人，依家傾到點幾兩點鐘都唔願起身，皆因生意淡薄，傾多兩嘴都冇問題！淡市不利新股上市，現貨交投萎縮，夜期幫助亦有限，睇嚟次季港交所（00388）經營表現難樂觀，季內股價或須再次考驗250日線（122元）支持。

環顧多個中資板塊，尋日基建及建材股算係有啲人氣，主要係有指全國城鎮化工作會議將於本月中、下旬召開有關，但其後又有內地傳媒引述消息指，由於各部門對城鎮化發展路線等細節未有共識，故該會議不會喺本月召開，直至條件成熟為止，唔知今日相關股份會否打回原形？總之，呢期魚缸人心虛怯，要自保短炒盡量走即日鮮，避免揸貨過夜。

人仔升值加劇通脹

最近人仔好似食錯藥，係咁升值，兌美元匯價連續四日創出匯改以來新高。可以預期，人仔升值勢必加劇香港通脹，百物騰貴嘅情況只會愈來愈嚴重，港元一日同美元掛鈎，且維持現有嘅聯繫匯率水平，邊個嚟做阿一都舉步維艱！所以有老股友話，睇通睇透股市缺乏良好經濟基礎支持，最叻只會維持上落市，一旦美國退市，低息環境正式告終，可能會引發大跌市，而嗰一刻先至會係下一個大牛市嘅起步點，信不信由你！

仍留喺魚缸搵食嘅游資有限，所以見到板塊都只係維持一、兩個輪流炒。風電股今年以來行業經營數據確有改善，但近期板塊估值已反映相關因素，升到咁上下，不排除資金隨時會流出重投傳統經濟板塊博反彈，故現階段才追入風電股，實宜注意風險。

以較為熱炒嘅兩隻風電股大唐新能源（01798）及華能新能源（00958）為例，今年以來股價累升幅度最多分別為87%及86%，單計本月以來累升幅度最多則同為35%。即使首季度發電量上升，股價升幅已頗大程度作出反映。再講，風電業屬資本密集型行業，大唐新能源及華能新能源去年度嘅淨負債與股東權益比率分別達到3.1倍及2.1倍。若然股價再升上去，我係管理層，都會諗吓趁有好價配股集資減債，故要提防升到咁上下就會開機抽水！再睇現價兩隻股一三年預測市盈率都去到近20倍，縱使有國策支持，如此大淡市能否支持呢門新興產業有更高嘅估值，值得三思。