樓市出更：北水起港樓 好戲連場

呢幾年唔少內地龍頭發展商都南下香港買地起樓，包括有中國中冶（01618）、雅居樂（03383）同中國海外（00688），近排越秀地產（00123）入標競投沙田九肚豪宅地皮，雖最終投唔到，但睇到佢哋再次積極投入香港房地產市場，尋日佢哋仲公布屯門青泰路地皮將會發展3幢獨立別墅。至於「重頭戲」係油塘工業區綜合發展區內東源街一批工廈，料發展逾80萬方呎商住樓面。

越秀地產尋日搵咗劉Sir出席旗下一個屯門豪宅嘅奠基儀式，該公司副總經理朱晨（朱總）話，佢哋集團早喺○五年賣過香港仔富臨軒。

北角粵華酒店擬重建

而啱啱奠基嘅屯門青泰路16號洋房發展項目（為金寶閣舊址），總樓面約莫1萬方呎，其中1幢面積近4,000方呎。項目建築費每方呎已約4,000元，諗住出年年底賣現樓。越秀地產（香港）董事何立偉話，之前統一業權嘅太子道西279號項目，重建後樓面約4萬方呎，最快一五年初推售。

朱總同劉Sir講，集團本港「重頭戲」係油塘東源街商住重建項目，佔地大約12.6萬方呎，可建總樓面超過80萬方呎，該批物業包括有越秀冷藏倉庫、高力電子大廈同埋隔籬嘅空地。至於北角粵華酒店將來都會諗住重建。佢又話，一五年前該集團喺全國物業銷售目標額約200億至250億元人民幣，一六至二○年香港物業目標銷售額佔約10億元人民幣。

朱總仲話，集團喺內地12個城市包括香港在內，大部分項目所在地區都未見有泡沫，佢仲話，香港政府近排出招，同內地比較，已算合理同溫和，所以公司未來會積極睇合適項目再大展拳腳。

萬科奪荃灣地夠震撼

近排中資頻頻來港投地，且出手都幾勇，最震撼當然係年初批出嘅荃灣西站六區限呎項目，當時由內地資金背景嘅萬科置業（香港）夥拍新世界發展（00017）以逾34億元投得，每方呎樓面地價約5,088元，高過當時市場估值上限逾18%；雅居樂副主席陳卓賢亦喺同一日，以7億元投得西貢碧沙灣豪宅地，樓面呎價高達21,349元。