Fundman睇市：富力地產 睇位上車

近期港股走勢猶如煙霧瀰漫的天氣一樣，昨日三時前港股仲好地地，有接近百點進帳，點知三時歐洲開市插水，港股形勢立即一百八十度轉。結果恒指連跌四日，跌102點，收報21,569點，創今年收市新低，一連三日沽空佔成交比例企穩一成樓上，昨日達11.19%。

波士頓爆炸事件對股市影響短暫，經過周一急跌，周二華爾街股市已經企穩，道指升157點，相當於周一下跌點數六成。反而港股二月初至今的長期積弱情況未知幾時扭轉。香港及中國股市真係難兄難弟，年初至今累積跌4.8%及3.3%，相比「黑田Put」刺激下日股的28.7%累積升幅，簡直係天堂同地獄寫照。尤其港股，已將去年十一月中21,098至23,944點升浪的83%升幅跌番出街（滬綜指係都只51%）。

港股或距浪底不遠

內地首季經濟數據差到極，昨日提過電力消耗數字跌到近四年最低增幅，中國經濟增長神話或會暫且告一段落。不過，按半杯水理論，第一季經濟基數因為春節及兩會等因素，出奇地低，樂觀看第二、三季有更大反彈空間。或中資股今個月未必有太多利好消息支持，國企首季業績大行都不抱厚望，大市可能在四月尾、五月初進一步試低位。不過，經歷二、三月大幅修正，估計跌勢將有所放緩，尤其首季中國GDP曝光後，近兩日A股跌幅已經相對溫和。

值得留意，過去三日跌市，跌勢頗集中於商品及油、金股，反而唔少二三線股低位沽壓明顯收斂，大市上升股票比例，由周一的兩成八同周二的四成三，回升至昨日的四成八，成分股終極一跌，或者意味港股距離今次浪底經已不遠。

自從「國五條」由傳聞變為事實，內房股反而紛紛反彈。國五條中最辣的是政府限價唔限量，新盤維持一二年定價，意味地產開發商唔能夠進一步抬高售價以推動毛利率改善。不過同一時間，調控的不明朗因素消除，擁有較多土儲、過往本身毛利率表現優異、有較多商用物業或者三、四線城市住宅項目的，反而可以把推盤焦點由「量」方面出發。

左揀右揀，富力地產（02777）及世茂房地產（00813）都較合史提芬心水，也符合上述條件，睇番兩隻股票由三月低位，分別回升29%及34%之多。富力三月份銷售額34.3億元人民幣，按年升14.4%，首季累積合約銷售88.8億元人民幣，按年升33.9%，完成了調高後全年420億元人民幣銷售目標的21.1%，可見管理層確係自視頗高。四月初推薦過，股價累積升幅唔算多，13至14元仲係唔錯的上車價位。