樓市出更:二線街舖 加租忍手

近排商舖租賃交投靜,唔少中環同埋銅鑼灣二線街舖業主為咗留住租客,加租時都忍手好多。舖壇老手黎永滔(滔哥)話,二線街舖租金今年好難有突破,相信今年續租平均加幅只係一成多左右,同舊年平均加幅比較,最少跌咗一半。滔哥又話,為咗同啲租戶共度時艱,考慮將一個租約就快到期嘅旺角舖位新租金,較原先意向調低約一成。

有代理報料話,中環些利街一個街舖啱啱只係以每月約5萬多元續租,比之前租金都只係多咗8%。個代理仲話,依家中環同埋銅鑼灣等消費核心區一線街舖出租率變化唔算大,不過,同區二線街吉舖就比舊年底多好多,增幅暫時有5至8%不等,但對現租戶續租時取態有一定影響。

滔哥對劉Sir講,依家市況今非昔比,一線街舖由於供應一向以來都唔多,租金仲頂得住,零售市場氣氛低迷下,唔少商戶為咗減輕租金成本,都會選擇唔續租,相信今年二線街舖租金加幅平均只會有一成多。

中環舖僅加租8%

佢仲話,旗下旺角一個租約將會到期嘅舖位,面積逾5,000方呎,今年初原本諗住加租至近40萬元,比現有租金高約五成,諗諗吓依家經營環境轉艱難,會考慮將意向月租調低一成。

聽啲代理講,近排唔少二線街舖續租租金加幅一成都無。好似中環些利街單號地下,面積約1,200方呎,原本由地產代理行以每月近5萬元租用,早排僅以每月5萬多元續租,加幅僅約8%。

另外,灣仔道62至76號地下部分,一個由藥房承租嘅舖位,面積約500方呎,啱啱只係以每月約6萬元續租,較前租金只調升約13%;據講,該舖業主擔心附近將會有幾個舖滿約,相信供應會大增,所以只係輕微加租留客。

力寶累劈價20%沽

「辣招」已出爐好幾個月,甲級商廈部分業主劈價幅度愈來愈深。有代理話,金鐘力寶中心2座有個高層單位,幾個星期內大刀闊斧共減咗近20%,日前成功以約2,280萬元連約賣咗,呎價只係1.7萬元,返番去一一年底水平。原業主揸咗上址大約四年,依家仍然帳面袋約600萬元,新買家係紀惠集團嘅廖偉麟或有關人士。

劉Sir

黎永滔指出,在零售環境前景不明朗下,今年二線街舖租金難有突破。(資料圖片)

黎永滔