Fundman睇市：中國太保 強勢初現

自中國公布首季GDP僅增長7.7%後，連日金融市場連鎖反應不絕，商品市場尤其金油跌勢誇張，澳紐等商品貨幣亦未能幸免，尋日世銀亦把中國經濟增長預測下調0.1個百分點，至8.3%。事實上，內地經濟復甦步伐，近期確有放緩趨勢，GDP連續四季在7.7至7.8%之間窄幅徘徊。中國國家能源局公布一至三月份全國全社會用電量僅得4.3%的低增長，唔少芬佬信內地電力數據多過官方每季一次的GDP，視之為經濟活動的寒暑表，經過一、二月春節因素影響後，三月升幅依然唔明顯，唔係太好兆頭。

有解說話，兩會期間高排放及染污行業要停廠整頓，多少影響經濟活動，另外，習近平反貪政策雷厲風行，限制公務及奢侈消費，唔少民生消費數據開始見效，貴州茅台跌到每樽1,300人仔，比舊年底跌三成，高級龍井及法國拉菲紅酒，都要跌三至五成。

重返二萬二問題不大

國統局數字顯示，年營業額超過200萬人民幣的大型餐飲企業，今年頭兩個月營收比去年同期跌3.3%，烹飪協會表示是七十年代開放改革以來首次。高級食肆為求存，紛紛轉走中檔路線。但三月份全國餐飲收入有8.7%增長，對小南國（03666）一類主攻普羅大眾的餐飲連鎖店影響相信唔會太大，不過若要畀太高估值，真係要諗清楚先。

隔晚美股大跌，港股尋日低開後表現卻唔錯，更一度倒升，但收市前回軟，埋單仍跌100點，收21,672點，未能締造一次單日轉向畀股民開心吓。不過，恒指尋日低位21,475點，已經十分接近二月至今的下降軌支持21,400點，吊頸都要抖吓氣，如果外圍平穩，短期彈番上22,000點水平應該問題唔大。

尋日保險股走勢悅目，鑑於H7N9疫情蔓延，中保監發出三則關乎禽流感及農業的保險通知，保險公司紛紛發國難財，推出疫情保險產品外，升得最勁的太保（02601），啱啱公布三月份保費收入184億元人民幣，按年升12.9%，相比首三個月4.1%增長，三月業務明顯增長加快，亦都好過同業及市場預期。

睇番太保股價近日在25至26元徘徊，尋日低開高收，一舉升穿10及20日線，分析員都睇好太保一三、一四年業績，估計會由一二年低位50.7億（人民幣．下同）大反彈，賺96.6億及109.8億，預期市盈率19.9倍，比上市後估值中位數26.2倍低一截，趁技術走勢突破及三月數據理想，短期不妨留意。