股海實戰:聯通抗跌力佔優

呢期金、股、匯市翻天覆地,金融市場人心虛怯,金價兩天內創三十年來最大跌幅,整個商品市場大幅震盪。有傳今次主力做空金價嘅大行包括美銀美林,亦有指另一導致金價大跌嘅原因乃日本加碼量寬,日本國債波動率顯著上升,日本金融機構要賣家當應付保證金上升。無論如何,經驗相告,呢啲大時代,波動冇咁快完結。若然恒指月底插穿21,000點結算,要有心理準備季內仍要再繼續反覆尋底。

講番尋日魚缸表現,恒指低開兩舊,午後曾倒升,但尾市又再向下,恒指收報21,672點,跌100點,成交增至628億元。阿莊尋日坐言起行沽貨減磅,以均價2.62元悉售京能(00579)及以均價4元沽出石藥(01093),另以均價2.01元沽出新晨動力(01148)8萬股。尚餘嘅新晨會再睇多一陣,中銀(02388)五月底派息每股0.693元,暫會繼續持有。

今年以來人仔穩步升值,三大中資電訊股有可觀人仔經營現金流,本來亦具一定嘅抗跌力,但其中中移(00941)今年因發展TD制式4G網絡而須承擔巨額資本開支,故表現要打折。至於聯通(00762),受惠近兩年3G業務蓬勃發展,加上3G資本開支高峰已過,4G需要投入嘅資源亦有限,故料今年表現可勝於中移。

搶飲GS4頭啖湯

咁啱尋日工信部電信設備認證中心網頁證實,三星Galaxy S4四個版本已獲入網許可證,據講聯通已確認今日開放預訂,食正頭啖湯,加埋盛傳五、六月蘋果公司又會推新產品,消息面應屬正面。但有一點令人唔放心嘅係,月初有消息指聯通主要股東西班牙電信喺出於自身嘅減債需要之下,考慮再減持聯通股份套現,雖則話沽貨唔係出於睇淡聯通前景,但若然有大批貨等住沽出街,班大戶即使想買貨都唔心急,甚而會沽空等平貨補倉。

再睇聯通嘅走勢圖,尋日低位9.69元,與去年低位9.45元相差不遠,唔爭在睇埋該位支持,守得住的話,可小注博反彈,兩個阻力位分別喺10元關同10.36元,但若然守唔住,就等落番9元關至諗。

阿莊

中移須為4G承擔巨額資本開支,反而聯通相關投資相對有限,是為優勢所在。(資料圖片)