樓市出更：合作社重建 逾6千伙幫補

本港住房需求大供應少，依家樓價又咁貴，一般市民想有個「竇」都幾難。立會議員謝偉銓就有新idea，建議政府收購公務員合作社住房，改為發展資助房屋，仲提出包括土瓜灣、北角同西灣河等5個合適地點，初步估計重建後單位數目有大約6,425伙咁多，比現有單位多咗接近4,700伙。

要善用土地資源，建築、測量及都市規劃界立會議員謝偉銓同劉Sir講，好似土瓜灣同西灣河等5個有合作社住房嘅地點比較大眾化，適合做資助房屋同長者屋等，粗略估計可以重建約莫6,425伙，比起現有單位量多出超過2.7倍。

舉例土瓜灣美善同道目前就有唔少合作社住房，提供約莫817個住宅單位，假設政府收購呢批單位，再交由房協發展資助房屋，以每個單位面積約500方呎計，粗略估計重建後單位數目可以增加至3,279伙，即係比原先增逾3倍。

西灣河可建1085單位

至於西灣河近太古一帶嘅合作社住房，若果重建資助房屋，單位數目都會多咗大約2.67倍去到1,085伙。佢提到，如果真係搞重建合作社，市區重建局同房協等部門嘅角色要分清楚，作為資助房屋，覺得對象唔一定係基層市民，依家中產嘅購買力都跌緊，應該提供某程度嘅資助。

安置補價勢受關注

當然，一旦收購重建，點樣安置現時合作社社員同點樣制訂賠償，同埋補地價等都係複雜問題。謝偉銓強調，以公平做原則，合作社社員必須補地價先可擁有單位產權，如果唔想補，佢提議有關社員可以繼續行使其居住權，不過就無單位嘅產權；佢預計有關建議會向立法會提交，但相信要喺財政預算案之後。合作社為以前政府以低市價賣地予公務員發展，但之後需向政府補回地價，才能轉售單位。

對於立法規管一手住宅物業銷售條例就快生效，謝偉銓就話，相關條款過分仔細，對保障消費者無幫助，法律講精神，唔係講細節，過分仔細會弄巧反拙，訊息亂七八糟，消費者更易混淆。