有利有幣：英鎊 1.5450樓上趁高沽

自進入第二季後，美元就出現調整，理據係近日美國數據無之前咁標青，而聯儲局在未來一季都未有退市條件，雖然有官員指聯儲局應該開始考慮停止買債或縮小買債規模，不過他們有些今年沒有投票權，投資者焦點只放喺主席伯南克或第二把膠椅嘅耶倫身上，而兩位都傾向繼續寬鬆，相信暫會限制美元升勢，出現美匯指數高位整固局面。

另一方面，英國數據如PMI、工業生產比預期為好，甚至有研究機構發表報告，話英國第一季GDP經濟增長有0.1%，可能避免出現三底衰退。英鎊表現強勢，不經不覺由1.48水平回升至1.53水平。如果英國GDP重新有正增長，相信市場將降低未來擴大量化寬鬆的預期，英鎊將進一步反彈。不過，若果到時數據未能重回正增長，英鎊隨時重新展開下跌浪，要知道GDP數據四月二十五日就揭曉。換句話講，英鎊只係偷位偷時間借勢反彈，係典型升得慢跌得快嘅格局，後市唔可以太樂觀。

睇番英鎊由今年一月高位1.63跌至1.48水平，如果用黃金比率反彈38.2%計，阻力就係1.5420，1.5450至1.55可能就係今次反彈的頂部，預期升穿1.5650機會不高。若果有機會衝至1.5450上方，相信將會係食英鎊跌勢第二浪的良機。