Fundman睇市：房託基金 繼續強勢

美國次按風暴中沽空銀行股贏大鑊的「沽神」約翰普爾遜，威過一輪之後無以為繼，近年更是未見佳作，基金價值縮水外，傳聞贖回壓力極大。不過，沽神仲係愛玩高調，去年中大大聲轉戰金市，據聞旗下對沖基金近半資金投入黃金，近期環球基金陸續把資金調回風險資產，美日股市愈升愈有，上星期，向來被視為避險資產的金價，由慢熊變成快熊，尋日執筆時見過1,404美元一安士，足足比上周高位1,590美元撻咗近190美元，今日沽神變燈神，揩邊瓣死邊瓣，都咪話唔信邪。

尋日中國公布第一季GDP得7.7%，比街外估的8至8.1%低一截，A股隊穿2,200點。港股同日失守22,000點心理關口，上星期累積反彈一鋪清袋，成交額比上星期五反彈近一成，去到550億。從來跌市成交升都唔係好兆頭，連續五日回落到一成樓下的沽空佔大市成交比例，也回升至11.5%，反映大戶見大市炒唔上，已經做晒兩手準備，掉頭向下炒。

分析員唔敢叫沽

事實第一季尾、第二季初內地數據顯示，經濟復甦步伐有減速迹象，基本條件唔配合之下，二月初至今彈散格局恐怕仲未玩完，如果萬六、萬八點係過去兩年港股低位，今年當股市氣氛轉差，試一試中期支持兩萬點關口的機會存在。

個市唔掂，芬佬點都要搵地方泊錢，房地產信託基金係最好不過之選，畀芬佬收釘捱時間，今年領匯（00823）及置富（00778）累積升13.7%及14.8%，比恒指走勢好得多。近大半年，隨着領匯個價屢創新高，預期股息率愈來愈低，唔少分析員都開始改口，但形勢比人強，至多睇中性，好少人敢建議沽售。事實美日量寬不絕，十年美債息由早前2厘樓上，碌番落1.7厘，若非已揸夠貨，或者看官未必有興趣現價買嚟收息，怕一旦股市氣氛好轉，賺息輸價，但作為基金避險寒暑表，其實就算唔買，都應該昅到實。

自特區政府出雙倍印花稅，同時進一步收緊按揭申請要求後，近期唔少放盤業主，都肯主動減價賣樓，「價細」指標屋苑天水圍嘉湖山莊，新聞話減價6至8%先可促成交易，減幅比買家額外付出的印花稅多（假設不是首次置業），意味樓市已經堅跌。

筆者認為香港樓市需求彈性好大，至少身邊幾個呻無樓的朋友，主要都係怕樓市升時人人賺錢自己執輸，愈貴愈上唔到車，但掉轉頭問佢，如果未來十年樓價都停留現水平，租轉買的興趣會即時大打折扣。

政府連環出招，以往樓價必升的共識，的確正無聲無色地逆轉，全城熱烘烘去抽新股一樣的青衣綠悠雅苑，唔少中簽者首日揀樓都褪軚。如果問史提芬依家入唔入市好？答案係有自用需要其實幾時都可以買，擁有一個自用物業唔代表你long緊樓市，最多係market neutral，揸住第二間先算長緊樓市。如果連自住嗰間都未有着落，其實等於short緊，只能求神拜佛，希望樓價跌幅會多過你每年幫業主供樓嘅供款。