股海實戰：中芯 未具突破動力

內地首季GDP增幅遜預期，加上市場憂慮H7N9疫情勢必影響次季經濟表現，昨日A股走低，拖累港股跌逾300點，成交薄弱。月底結算前，指數波動可能擴大，缸邊友要緊握扶手。仍留喺魚缸嘅資金四出尋找避險之所，房託有資金流入，好似阿莊喺月初提及嘅越秀房託（00405）升0.4%，置富產業（00778）更創五十二周新高7.38元，總之小心駛得萬年船！

手持嘅京能（00579）早前調整守穩2.2元，故仍持有，尋日高位去到2.75元，收報2.66元，升1.1%。畢竟只係「時勢造英雄」，呢轉升浪已反映風電業經營情況略有改善，再高追就兩睇，阿莊亦打算周內沽出食胡。

石藥4元樓上食胡

至於醫藥股，開正流感疫情呢瓣，手持嘅石藥（01093）高位曾見4.13元，反正已較心目中嘅沽出價3.8至4元還要高，短線喺4元樓上亦會睇位先行獲利。反觀汽車股真係唔爭氣，新晨（01148）2元邊要減磅。

中芯（00981）尋日逆市上升，全日高見0.5元，收報0.485元，升2.1%。講到呢隻半導體股，相信勾起唔少股民嘅傷心事。一家獲國家支持嘅半導體公司，過去長年因與台灣同業爭拗，業務一直冇起色，股價一沉不起，直到近幾年官司了斷、管理層進行大換班才現轉機，去年業績轉虧為盈，賺2,277萬美元，主要受惠晶圓付運量上升，銷售額按年增29%至17.01億美元，毛利率由前年度嘅7.7%增至20.5%，經營活動現金流淨額約15%至4.35億美元。期內通訊產品佔收益比重上升3.9個百分點至45.8%，而數碼電視、電視機頂盒及遊戲機等消費性應用產品佔收益比重43.6%，料受個人電腦市場增長放緩影響不大，但今年海外客戶訂單尚不太明朗，盈利增長勢頭能否持續有待觀察。

中芯現價往績市盈率高達80倍，難免令人卻步。去年下半年，台積電一直喺市場減持中芯持股，既然冇心長期持有，早沽早着，相信現價亦應已反映相關因素。短期股價波幅維持喺0.45至0.53元，近兩個月底部支持有上移迹象，但能否突破波幅區頂部，看來要等下周三公司公布嘅首季經營數據，始能提供答案。講到底，呢隻股浮浮沉沉太多年，基本因素必須持續有明顯改善，始可令投資者徹底改觀，否則齋短炒上落，缸中應不乏更好嘅選擇！