樓市出更：補價縮九成 3季最奀

以前補地價係政府收入主要來源之一，但近年政府賣地多咗，發展商重建市區舊樓多咗，要補價嘅新界項目都拖住先。劉Sir真係講唔出有咩大型項目傾掂補地價，補價收益唔跌就奇，好似今年首季政府補地價收益得5.5億元多啲，係近三季最少，按季大大話話少咗89.9%，計番去年四月至今年三月底上年度全年補價收益，埋單計數都係得120.76億元，對比一一年及一二年度少咗26%。

劉Sir睇見地政總署最新數字，今年首季補地價收益只係得大約5.5億元，比起舊年第四季55億元唔見咗89.9%。

長沙灣項目補逾4億

睇番最新登記完成嘅補價個案真係無乜睇頭，最大已經係長沙灣長順街17號美心食品第三廠，補價金額都係講緊約4.18億元咁大把。

呢個項目亦都同時簽立契約修訂個案，項目喺一一年已經獲屋宇署批出建築圖則，獲准發展1幢25層高商廈，總樓面接近19萬方呎；至於香港興業（00480）等嘅荃灣美環街27至37號中國染廠大廈，亦以1.039億元完成補地價，料作商業用途。

黃竹坑活化酒店過關

講到活化，又點少得酒店項目，好似服務式住宅Ovolo黃竹坑道64號，就啱啱簽立契約修訂個案，獲准作酒店發展；至於觀塘鴻圖道88號志聯中心，亦都成功申請做寫字樓、食肆及商店等用途。

由於上季補地價金額突然下滑，所以上年度補地價收益都少咗。劉Sir知道，上年度政府補地價收入加埋約莫120.76億元，比起對上一個年度減少咗26%，如果唔係有九倉（00004）舊年六月以79億元完成補地價嘅尖沙咀海運大廈，再加上逾37億元補價嘅灣仔合和中心二期兩個項目上年度完成補價，劉Sir相信上年度條數都真係慘不忍睹。

不過，相信今個年度政府補地價收入唔會比上年度差，好簡單，因為最少有港鐵（00066）大圍站上蓋大型項目撐住，雖然舊年正因為項目補地價達127億元搞到流標收場，依家港鐵都未同政府傾掂數，但相信都唔會少得去邊，劉Sir認為今個年度補地價收益好大機會止跌回升。