Fundman睇市：內銀股乏炒作動力

當全世界資金被美日兩個股市大磁鐵吸住，港股實在有點拉牛上樹的感覺，尋日恒指由早市升200幾，到埋單得番66點進帳，收22,101點，成交連續第四日在600億元樓下，絕對唔配合升市，依家至怕外圍升，港股逢二進一，一旦外圍跌市，港股就跟到十足十！

尋日港股升唔起，另一個原因係A股偏軟，早市滬綜指見過2,242點，一度上番10日線2,234點，可惜收市倒跌6點報2,219點。本來早市人行發表三月份新增貸款達1.06萬億元（人民幣．下同），較二月份的6,200億元低位回升，亦好過大行預期的9,000億，意味經濟增長動力轉強，可惜近期連環透過正回購收水，內地資產泡沫，尤其房地產價格，已成為中央新重點調控對象，北京、上海相繼推住房限購和房貸限制措施的消息，抵銷一切正面的數據刺激。

新增貸款數字咁勁，本來內銀股點都可以威番一陣，但昨日所見，四大行完全炒唔起。早前講過，今時今日內銀股，無人再提基本因素，純粹係市場對短期中國經濟氣氛的投射，只適宜在中資股整體氣氛惡劣下買入，氣氛一改善就食胡。

由聯想（00992）急挫，話畀大家聽乜嘢叫做希望愈大，失望愈大。股價跌到7.09元（港元．下同），比入藍籌後高位9.07元累跌22%，一三年預期市盈率15倍，比過去六年中位數17.6倍折讓一成五，現在要看PC出貨量轉弱之後，智能手機是否真能帶領聯想再創高峰。短期而言，7元應該已經差唔多。

TCL多媒體估值吸引

相比電腦股，電視股估值實在平易近人得多，TCL多媒體（01070）的預期市盈率只得8.5倍。

早前的營運數據顯示，TCL多媒體首季LCD電視機銷量按年升21.5%，至391.23萬台（增幅高過管理層全年目標銷售增長15.9%）。在歐洲智能電視銷售改善，以及高端的3D電視比重上升下，整體高端產品比例有所改善。展望第二季，TCL多媒體開始推解像度更高的4K電視，相信可以進一步拉動產品結構，提升毛利率。第一季數字顯示在內地市場佔率有上升趨勢，大行估計未來三年盈利可保有雙位數字升幅，平均估是12至14%，現價是頗合理，唯一可以彈係今年股價升幅唔細，年初至今累積升42.6%，如果股價去番5.5至6元，吸引力會更大。