股海實戰：燃氣股中長線睇好

內地三月份新增貸款數字勝於預期，顯示中央一方面收緊市場流動性，另一邊卻透過銀行體系加大放貸力度，總之有保有壓，大前提係確保經濟持續發展。不過，銀行體系及樓市風險問題複雜，年內調控唔會放鬆，所以展望A股嚟緊表現，雖則未有大跌之虞，但大升嘅動力亦未宜抱太大期望。

尋日港股繼續挾淡倉，阿莊冷眼看待，反正呢個唔係買嘢嘅時候。見到大市沽空金額54.9億元，其中盈富基金（02800）沽空額達4.6億元，沽空比率達73.6%，若然大戶相信大市見底回升嘅話，斷估唔會出現咁嘅現象！

今年首季內地汽車銷售情況勝預期，中汽協數據顯示，季內國產汽車產銷量分別為539.71萬輛和542萬輛，同比增幅分別為12%及13%；若單計三月份國產汽車產量208萬輛，銷量203萬輛。不過，喺兩會後新一屆政府多番強調打貪，內地奢侈品消費勢受影響，城鎮化亦只會帶動中、低端汽車銷售，故買車股宜揀從事製銷國產同具節能效益嘅中低端車嘅股份較佳。

全國各地城市陸續調升氣價，故見近期燃氣股有資金流入。但阿莊相信，燃氣屬公用性質，應該以中長線投資成長股，而非投機炒股看待。講到燃氣股，投資者仍在觀望中燃（00384）與中石化（00386）落實戰略合作詳細條款，相信7元邊入市較穩陣，升到上接近8元附近，除非真係有好消息出現，否則短炒唔太值博。

北控（00392）去年度管道燃氣業務佔純利比例高達79.5%。公司透過旗下北京市燃氣集團從事天然氣分銷業務，截至去年底天然氣總用戶數目達到469.4萬戶，去年之總銷量達79.4億立方米，其中採暖製冷佔44%、燃氣電廠佔28%、家庭及其他佔18%，其餘來自公共服務及工業用戶，客戶基礎多元化。此外，公司已涉足車用氣市場，今年目標喺市內形成一萬輛天然氣車規模，前景有可為。

北控攻守兼備之選

除燃氣業務，北控還兼營啤酒、污水處理及收費公路，業務多元化，與集中做單一能源業務嘅昆侖能源（00135）相比，北控較為優勝。股價走勢方面，本月上旬升穿60元關後未肯回頭，尋日高位見64.5元，收報64元，相信係避險資金流入所致，現價一三年度預測市盈率約19倍，屬攻守兼備之選，初步支持區喺58至60元，年內股價料可反覆向上挑戰70元關。