樓市出更：線悠甩底客 投奔私樓

青衣綠悠雅苑唔少買家「甩底」，購買力開始流番入同區二手市，近排有中籤者嫌項目開價太貴、又驚兩年後上唔到會，撞啱有業主減價，索性以417.8萬元轉買同區私樓海欣花園；另外，五千白表免補地價大軍即將殺入市場，有綠表客怕被搶貴，故此以193萬元創同類新高價，快手購入黃大仙鳳德邨一個近600方呎公屋單位。

利嘉閣何振榮同劉Sir講，呢個原本諗住買綠悠雅苑兩房單位嘅買家，已經中咗籤，但後來覺得個價都係太貴，又擔心兩年樓花期後上唔到會，最後決定放棄揀樓，睇下同區二手市場。

有個海欣花園5座中層C室，建築/實用面積610/451方呎，原業主又肯減價，索性轉買私樓，成交價417.8萬元，平市價5%，成交建築/實用呎價約6,849/9,264元。

青宏苑削價22萬沽出

何振榮又話，其實近排都已經有一批無買綠悠雅苑嘅客，開始喺青衣搵樓，佢哋嘅目標係樓價400萬嘅樓，好似翠怡花園、海欣花園同部分居屋兩房單位。

其實青衣業主都開始做嘢，中原林振邦表示，區內居屋青宏苑B座中層3室，業主原本叫330萬元，見綠悠雅苑向隅客回流，實行減價吸客，最後畀外區公屋租戶用綠表308萬買咗，減價22萬元，建築/實用呎價約4,490/6,087元。

公屋高追 鳳德綠表193萬

富誠地產林栢榮話，有個綠表買家就驚綠表價會被搶高，但預算得200萬唔夠，連居屋都無乜得揀，最後用咗193萬元綠表買咗鳳德邨紫鳳樓高層2室，係同類綠表新高，建築/實用面積578/442方呎計，呎價3,339/4,367元；其實區裏面都有買唔到綠悠雅苑嘅向隅客搵樓，主要係睇居屋。

四圍居屋都有減價，世紀21物業魏仕良話，將軍澳英明苑E座中層2室，賣420萬元，實用呎價6,512元，比市價平5%；中原楊俊偉話，屯門兆康苑兆健閣中層3室，放咗盤一個月，即減約11萬賣218.8萬元。