股海實戰：青啤 值得享高估值

內地股市尋日表現比想像中好，港股亦乘機定定神，恒指收市跌8點，報21,718點，但成交僅580億元，反彈動力欠奉，會唔會回過氣後再向下尋底，阿莊認為可能性大於五成，所以都係勸大家咪心急入市撈底，以免接火棒，而仍持重貨者，別錯過減磅機會！

上周五嘅跌市重災區航空股，昨日有反彈，但季節性流感至少仲會持續幾個星期，縱使航空股估值已現吸引力，短線仍難擺脫淡風，博反彈可免則免。夜期首日啟市，執筆時見到恒指夜期報價冇大變動，首個鐘只有約300張成交。

夜期交投未見活躍

以往做卜架係一份優差，十點鐘開工、兩個鐘食飯、四點鐘收工；但如今早咗開工少咗食飯時間唔在講，行埋夜期，即使該時段唔做買賣都要留意變化，以應付客戶查詢，全日戰線變相拉長到朝九晚十一，但對刺激生意作用成疑，真係無奈！

尋日阿莊話，跟傳統經濟關係不大嘅新能源同環保股有望跑贏大市，果然尋日見到一眾新能源股逆市上升，表現較突出嘅有大唐新能源（01798）同國電科環（01296）。但當然，若果香港證實有人感染新流感病毒，淡友發力一踩，則覆巢之下，難有完卵。所以跟炒還跟炒，都係小注怡情，記住依家魚缸風大雨大，唔係搏命嘅時候！

好耐冇睇過隻青啤（00168），最近公布去年度業績，營業收入增11%，至257.8億元（人民幣．下同）；純利微增1%至17.58億元。年內公司實現啤酒銷量790萬千升，同比增10.48%，較去年全國啤酒產量增幅3%為高，公司目標乃於明年實現啤酒銷量1,000萬千升。去年其內地市場份額增3個百分點至16%，證明估值向較同業有溢價有其原因。雖然華創（00291）擬購金威啤酒（00124）嘅啤酒資產以擴版圖，但青啤亦積極部署，旗下廣東揭陽公司一期25萬千升啤酒生產項目已建成投產，並已在原先產能空白嘅江西九江同河南洛陽分別啟動新建啤酒項目，至於與三得利啤酒簽訂戰略合作協議，雙方進行嘅整合料於今年中完成。

今年以來，青啤股價表現一直強於恒指及國指，尋日收報48.75元，逆市升2.96%。以青啤擁有強勁嘅經營現金流，加上一直保持喺中高端啤酒市場嘅領導地位，隨着全國銷售布局逐步完善，同業戰略合作效益體現，加上坐享人仔穩定升值，盈利前景展望穩定。現價往績市盈率30倍，250日線處45.4元，若次季受跌市拖累跌穿250日線，值得作中長線投資。