樓市出更：藍馬12億貨疫市放售

政府出招打殘樓市無耐，內地城市接連爆出疫症，本港樓市前景如履薄冰，一向好少賣住宅投資物業嘅藍馬集團，委託代理一併放售沙田嘅嘉御山一幢洋房，同埋尖沙咀名鑄一個高層複式戶，以及喺旺角嘅藍馬之城全幢商廈，市值加埋大約12億元，收租回報約兩厘。

素來低調，同埋以長線收租為主嘅藍馬集團，舊年年底已搵代理放售尖沙咀加連威老道一幢商廈，同埋同區厚福街另一幢商廈。依家佢地再放售旗下上述一項商用物業及兩項住宅物業。

據中原（工商舖）李婉琪（Cassandra）同劉Sir講，現放售嘅嘉御山雙號屋，建築面積大約4,380方呎，市值約近1億元；至於尖沙咀名鑄嘅60多樓G室複式戶，建築面積約2,743方呎，市值逾1億元。聽講前者洋房大約兩年多前以7,000萬元購入，而後者一年多前購入價大約1億元。

文咸西街巨舖叫億四

全幢商廈搶手，Cassandra話，藍馬集團放售嘅旺角彌敦道761號藍馬之城全幢，樓高20層，現時百分百租晒，月租約155萬元，市值約10億元。有代理話，該幢大廈係藍馬集團大約○六年以兩億多元買入，即係依家調高約四倍賣。

自雙倍印花稅推出後，工商舖市場頻現取消交易及蝕讓情況，但亦有例外；中國星（00326）公布，該公司共以7,633萬元購入上環孖沙街20、22及24號地下、閣樓同1樓嘅商舖，作為旗下南北行喺區內擴充用。是次買賣係透過買賣公司形式，除了原業主獲利轉售該批舖位外，新買家亦慳咗雙重印花稅，以約8.5%稅款計，可省約648萬元。另利嘉閣連秋成話，同區文咸西街13至19號巨舖業主叫1.4億元放盤。

金行貴租搶旺角地舖

有代理報料，有間上市金行續租咗旺角港鐵站附近地舖，月租近77萬，呎租大約350元，同前租金大增約一倍。

另外有間連鎖餐廳以每月近44萬元續租一個商場地舖，租金較前升逾15%。另酒樓都積極搵地方開新店，壹置業顧問文熠邦話，尖沙咀亞士厘道九龍中心3樓全層原由業主自用作寫字樓，啱啱畀煌府婚宴專門店以每月58萬元租咗，呎租大約46元。