期指攻略：市底仍虛難望突破

日股連跌兩日，影響港股復市表現，恒指昨日先低後高，升68點，收報22,367點，不過留意到三個因素，顯示市底其實仲相當之「虛」。

昨日恒指升幅近五成九來自一隻滙控（00005），實際反映市況的股份升跌比例，出現34對66的一面倒情況，意味三分二股份要跌，大戶托住重磅股散貨味極濃。二，升市成交不增反縮，主板僅601億元，是過去十四個交易日以來最少。三，沽空佔總成交比例，由假期前的11.3%升至12.42%，上次咁高沽空比，已是去年的八月三十日的事，可見大戶對買貨的興趣，及唔上沽空咁大。

期指昨日即市高低位22,472及22,097點，早在十點前出現，之後只係維持窄幅上落直到收市。

以昨日高位22,472點計，仲差百點先到目標22,581點，22,185點的好倉，揸近兩星期，今日會搵機會食胡。就技術走勢而言，短期跌浪的0.5反彈阻力遲遲未能收復，後市即使唔跌，反彈動力都唔慌勁。