Fundman睇市：地產股 可重新睇好

歐元區三月製造業PMI再跌穿50盛衰分界，落到去46.8，是去年十二月以來最低，但二月失業率就維持在12%高位。另外，日本股市連隊兩日，皆因聽日日本央行議息，即使黑田提早推出量寬措施，但市場老早已經炒定先，但若然真係按程序辦事，排到一四年至推出，今年累積升近兩成的日股，唔畀人質到爆就有鬼，試問咁嘅環境，點令人有興趣去買嘢。

塞浦路斯搞妥又輪到斯洛文尼亞財困，最終聯儲局退市預期的炒作不了了之，反映長期利率走勢的美國十年債孳息，由2.1厘碌番落去1.8厘附近，加埋市況唔就，顯示資金繼續眷戀高息股，兩隻REITs領匯（00823）及置富產業（00778），近月一直貼住歷史高位橫行向上，年初至今，連電能（00006）都要升11.3%。本來中電（00002）預期息率3.8厘，至多算係半隻高息股，早前份業績驚喜唔大，但就揚言為配合政府的環保及減排要求，輸入天然氣令成本壓力大增，未來幾年需要大幅調高電費。

跟大股東買中電

社會輿論對加價無好感，可以明白，最後加幅會唔會又係「叫高開低」，只能等歷史告訴我們，但去年十二月開始米高嘉道理家族持續從市場增持，是近三年多來首次，巴菲特話大股東身體力行入市最信得過，一一年至今因為澳洲業務阻滯，中電幾乎無升過，今次大股東入市，畀到小股東一個重要啟示。

恒指尋日升68點，大戶力托滙控（00005）頂住指數，不過二三線卻係跌多升少。銀監嚴管理財產品影響力仍在發酵，中信行（00998）及民行（01988）分別跌6%及4.2%。國五條地方細則曝光，同分析員預期出入唔大，加埋三月百大城市樓價升幅加快，部分內房股趁壞消息出盡反彈，世房（00813）升4.8%，保利置業（00119）升2%，碧桂園（02007）、遠洋地產（03377）升1.5%。

三次辣招之後，瑞銀地產分析員調低本地全年樓價預測，由原來股價持平到5%跌幅，擴大到跌5至10%，但認為地產股由一月中高位平均調整近17%後，目前平均資產淨值折讓擴大到38%，已充分反映樓價的潛在下跌風險，點名睇好長實（00001）及新世界發展（00017），主因是短期推盤主攻用家，影響相對輕微，另外亦睇好新地（00016），強調公司是領匯之外在港擁有最多商場零售物業的巨無霸，近年逐步把商場轉型，吸引內地遊客策略可取。