股海實戰：深高速 弱勢未見底

復活節長假完結，但清明節假又當前，唔少缸邊友仍在度假中，故見尋日港股成交仍然偏靜，恒指窄幅上落。坊間有唔少關於次季股市表現預測，阿莊就認為，首季港股已見上半年高位嘅機會甚大，次季最好喺現水平再作調整，咁下半年仍有望再試衝年內高位，本季初反彈上唔番23,000點可以試沽，等回試21,000點支持先至再平淡倉同入市分注撈現貨。

早前提及過嘅滬杭甬（00576）宣布，斥資2.8億人仔參與浙江省交通財務，完成後將持股35%。藉着今次投資，滬杭甬再一次涉足到金融業務領域，成功收購一間獲銀監會批准嘅非銀行金融機構重大股權，且與其現有金融證券業務可產生協同效益，亦有助平衡公路業務風險，消息利好，股價回落至250日線5.73元，可認真考慮作中長線吸納。

現死亡交叉利淡訊號

講開公路股，又睇睇隻深高速（00548），上月中旬股價未能衝穿3.4元阻力後掉頭走低，本月初10日線跌穿50日線，現死亡交叉利淡訊號，長假前失守250日線，尋日股價曾低見2.86元，14日RSI僅24，已進入超賣區，但尚未見反彈迹象。

深高速股價弱勢有因，去年度賺6.84億元（人仔．下同），同比下降21.78%，主要受累宏觀經濟增長放緩、廣東省實施統一方案及全國實施假日免費方案等因素影響，其中統一方案及節假日免費方案政策實施令公司年內路費收入減少2.36億元。年內，機荷東段及西段嘅息稅、管費用前利潤均告下跌，幸而梅觀高速、清連項目、武黃高速及鹽排高速相關利潤有增長。由於統一方案自去年六月起實施，而節假日免費方案去年嘅影響僅為八天，故料今年受相關負面影響嘅程度將進一步擴大。

另一個利淡原因，乃來自政府回購嘅壓力，一旦深圳市政府落實回購梅觀高速南段或全段，可能對公司短期盈利水平及長期盈利來源造成打擊。此外，近年政府計劃逐步取消二級路收費，若清連二級路近期取消收費權，亦可能存在資產損失嘅風險。公司今年所定嘅總體路費收入目標乃不少於26億元，略低於去年實現嘅路費收入27.2億人仔。近月股價走低，也許正預先反映今年經營仍面臨挑戰，估值下調及政策風險等負面因素。

股價方面，技術上可能要回落至2.6至2.7（港元．下同）始有反彈，但上唔番3.1元樓上嘅話，頗大機會喺完成反彈後再度探底，喺公司找到其他開源節流嘅新方案前，二選一嘅話，阿莊寧揀滬杭甬。