樓市出更：力寶摸售 炒家輸近200萬

加辣招措施後，工商舖買賣一日靜過一日，成交期愈近，斬纜個案愈多，有投資者喺出招前嘅一日買入金鐘力寶中心2座高層戶，揸咗大約兩個星期見勢色唔對，寧願以3,470餘萬元蝕讓摸出，帳面損手近200萬元，相信係新措施後寫字樓首宗摸貨蝕入肉個案。

政府落重藥打擊炒風，唔少諗住短炒嘅老友都趁上會前減價、甚至蝕少少走人，睇番土地註冊處嘅資料，上述力寶中心2座高層08室，於出招前一日以3,668萬元成交，不過上個月初即刻就以3,471.3萬元摸出，樓價短時間平咗196.7萬元，跌幅超過半成。

油麻地舖傳撻訂

劉Sir聽聞，上述單位面積大約1,653方呎，即係呎價大約2.1萬元，算係市價水平，之前揸咗大約兩個星期。有代理朋友話，力寶中心算係多人炒嘅甲級寫字樓，同時亦係英雄塚，有「摸王」之稱嘅黎汝遠上個月都壯士斷臂，棄購該廈1座一個低層戶，以成交價約4,000萬元估計，帳面損失可能約100多萬元。

另一方面，市區就繼續傳出商舖棄購個案，聽講油麻地彌敦道393號地下一個地舖，舊年聖誕節前以約6,500萬元賣出，面積大約700方呎，有傳早排取消交易。

尖東舖貴租照搶

雖然商用物業買賣吹淡風，但傳統旅遊區商舖租務都依然撐得住，日本飲食達人鄭威濤（Ricky）同劉Sir報喜，佢同幾個老友舊年夾份買嘅尖東東海商業中心G7至G9號地舖，月前劏成5個細舖出租，依家全部租晒，租客包括參茸同影音等，而月租加埋大約62萬元，同上址前租客連鎖日式食店元氣壽司比較，多咗差唔多兩倍，收租回報率由之前1.6厘唔夠，升到現時超過4.4厘。

此外，有代理話，尖沙咀金馬倫道單號地下一個面積500方呎到嘅細舖，畀間健康產品店睇中，以每月28萬元租咗，估計較之前租金多咗超過50%；此外，一間連鎖食店睇好銅鑼灣零售前景，早陣子喺區內怡和街再開多一間舖，月租大約35萬元，比起前租升咗都有75%。