期指攻略：好倉轉下月目標22581

期指結算日以為鬼哭神嚎，事實卻是平淡之極，四月期指昨日早上十時十八分，已完成全日高低位22,330及22,556點，之後交易時段，在22,409至22,530點的百多點波幅內悶到收市，長假前大孖沙收爐味道極濃。

隔晚美國經濟數據大部分優於預期，道指再創新高。即使拉牛上樹，但港股在第一季結前夕總算升153點，收報22,464點，主板成交633億元，比周二641億元回落，始終臨近長假，唔算縮得太離譜。

唔使睇波幅指數，有參與開的期指玩家，都應該感受到近期即市搵食艱難的事實，大市由23,262點急跌至21,975點之後，完全跟唔到外圍升勢，港股自顧自低位沉淪。筆者七成信心恒指在21,975點見了短期低位，但要瞓身，刻下這種市況顯然唔係時候，今次小注在22,185點開好倉，揸近一星期，帳面利潤唔夠300點，不過總比給無定向風的市況打完左邊面再打右邊，日日揩幾十點好。好倉轉落四月，見咗22,581點目標食胡後再諗。