股海實戰：海通證券 吼位買貨

尋日係期指結算日，恒指一度重上22,500點樓上，但交投仍然偏靜。展望四月份，暫未見有好大嘅上升誘因，特別係二、三月熱錢流出魚缸，相信冇咁快會回流，加上業績期將告一段落，市場缺乏焦點。走勢上，短線恒指50日線23,032點已成為一個較大嘅阻力，阿莊就維持一旦跌穿22,000至22,100點水平宜先行離場觀望嘅睇法。

發改委終於宣布成品油調價新機制，中石化（00386）股價升2%。喺三桶油之中，似乎中石化有較多嘅利好因素支持，次季股價表現有望繼續跑贏同業。

炒iPhone概念要搶先

另外，iPhone概念股有追捧，阿莊喺上周四推介嘅瑞聲科技（02018）見五十二周新高36.9元，收報36.25元，飆8.2%；舜宇光學（02382）亦升7%，收報8.83元。究竟蘋果公司會否一如傳聞喺年中推出新產品，乃市場焦點，但過去經驗告知，相關概念股多數係提前炒作，到正式公布新產品嘅時候，股價就會見光死，故沾手相關股份者，宜掌握好入市同落車時間。

尋日市場盛傳內地下月將重啟IPO。其實呢樣嘢經已講咗一段時間，市場擔心一旦成事實，A股市場承接力將再次受到考驗。但阿莊認為，股市係企業融資嘅地方，正常唔可能長期停止IPO活動，重啟只係時間問題，相信經過中證監嘅財務核查，嚟緊IPO質素將會提高，無論保障投資者同A股長遠發展，影響均屬正面。

對券商行業而言，重啟IPO意味A股融資功能再次啟動，促進交投係好事。舊年證券行業經營環境嚴峻，但見海通證券（06837）去年度賺30.19億元人仔，同比僅跌2%，成績算係有交代。喺主營嘅證券及期貨經業務中，去年喺零售業務嘅市場排名跳升兩位至第二名，機構業務嘅行業排名亦為第二，保持了龍頭地位。

綜觀今年首季以來嘅A股表現，論指數確已由高位回落，但論成交整體上仍比去年同期好，這點有助支持券商股估值。

另以至今為止內地企業最新公布嘅業績數據計算，目前A股估值未有大幅下調嘅壓力，但當然，市場擔心IPO重啟初期會令A股再現震盪非毫無根據，但阿莊同時相信，A股估值具基本因素支持，任何大幅波動只會係短暫性。建議觀望IPO重啟期間滬綜指喺2,200點嘅支持（此位乃去年末季低位升至今年首季高位嘅升幅0.5以及250日線所在），守穩其上，可中長線吸納優質中資股，海通可視為中資券商股佳選！