樓市出更：二線舖投降 劈租3成

政府出招打窒工商舖炒風，唔少商舖短炒變長揸，租盤多咗，租金自然受壓。核心零售區二線街舖租盤率先受影響，比之前多咗一成，業主減租求客個案多咗，平均減幅有15%，比出招前擴約8個百分點，有業主更大幅劈租達30%求客。

有代理話，銅鑼灣渣甸街有個雙號地舖，喺一個月左右竟然兩度劈租，減幅加埋超過30%，喺淡市下終於成功以每月約18萬元租出。

渣甸街舖數月租唔出

核心零售區一線街舖供應唔多，租金有支持，暫時未見有業主大幅減租吸客個案，不過同區二線街舖業主對市況波動就比較敏感，加埋市場盤源陸續上升，有代理同劉Sir講，出招之後，二線街舖租盤多咗大約一成，業主要突圍而出，惟有直接減租。

難怪六福集團（00590）首席財務總監陳素娟喺出招之前都話，近排舖位租金升幅有放緩嘅情況。

聽講銅鑼灣渣甸街一個雙號地舖，業主原以為個單位交吉咗可以租貴啲，意向月租企硬大約26萬元，點知過咗幾個月都租唔出，直至市況轉差，業主終於面對現實，一個月間極速兩度減租，終於以每月大約18萬元租出舖位，呎租約300元。

有代理老友同劉Sir講，旺角通菜街雙號地下部分地舖，原本由數碼影音產品店租用，舖位舊年交吉之後，業主對後市好有信心，意向月租要23萬元「不二價」放租，早排有連鎖食品店傾租，業主擔心後市，最終願意以每月約21萬元將舖租出，呎租約210元。

租客扭計逼業主讓步

舖壇老手黃海明話，雙倍印花稅公布後，商舖買賣氣氛急轉淡，租賃市場都走唔到雞，準租客都趁勢「扭計」，要求業主減租，喺依家環境租客主導下，零售核心區二線商舖業主想早啲租出舖位，都肯讓步減租。

整體而言，佢預期除一線街舖租金平均仍可有約一成嘅升幅，今年全年二線街商舖租金只可以平穩發展。

此外，一線街舖租金仍然強勁，有代理話，一家連鎖鐘錶珠寶店以每月120萬元續租銅鑼灣羅素街地舖，呎租1,500元，比舊租升超過1.6倍。