期指攻略：市況改善續持好倉

昨日港股技術走勢的確有改善，早段無跟隨A股急跌，成交由過去兩日低位反彈。恒指尋日低位22,088點，剛好為上星期三、五兩個低位21,975及22,033點的延伸線22,090點之上，之後更拗腰倒升，重返10日線22,299點樓上，這是好友重新主導市況的迹象。

昨日恒指升59點，收報22,311點，即月期指由四點現貨收市高水4點，到四點十五分低水36點，收報22,275點，相信同唔少即市好倉客決定唔過市有關。事實上，前晚歐美股市通通高開低收，昨日A股錄得1.2%跌幅，在外在因素影響下，大市呈現背馳，期指由即市低位22,082點，一直挾高去到三點半後22,372點，接近300點波幅，對近期慣了高開低收捱價的好友，先鎖定利潤的想法是可以理解。

今日大市如能再升，後市向好形態更為確定。22,185點開的好倉，上調止蝕價至22,082點，短期目標繼續睇22,581點，今日開市唔到價，會先轉倉落四月，繼續等市升。