SUN勢力:匯源果汁 憧憬收購

雖然塞浦路斯即使跟歐盟達成協議,但外圍偏軟,港股昨日早段亦無厘神氣,多隻業績唔差的股份不升反跌,投資者趁消息出貨,加埋滬綜指一度挫逾30點,搞到缸邊散戶心情十五十六,落場都唔敢太大注。不過,筆者認為季結在即,基金經理點都要幫個櫥窗扮靚,這兩天勁跌的機會唔大,大戶都係撳住重磅股,其他中細價一樣有鑊氣,昨日創五十二周新高的股份共36隻,其中六隻仲要成交逾億元,氣氛唔係靜到無影。

自從跟可口可樂合作告吹後,匯源(01886)股價跌吓又跌吓,一一年時跌到2元樓下,唔到當時可口可樂收購價12.2元的兩成,業績去年上半年見紅,轉蝕3,217萬元人民幣,果汁飲品銷售下跌,靠水及其他飲料撐住吓。

公司今日會公布全年業績,暫不抱任何期望,不過匯源始終是內地知名果汁品牌,就算近期一度盛傳的廣藥(00874)收購被否認,仍無改遲早搵到頭好人家的憧憬,因匯源主席早前曾透露,當年除可口可樂之外,仲有百事可樂都提交過建議書,有興趣作出收購。匯源現市值55億元,不再是天價,股價調整兩日後昨日反彈,守得住3.5元,可試4.3元短期阻力。

匯源果汁(01886)

阻力位:4.3元

支持位:3.5元

積奇