Fundman睇市：國美 不宜期望過大

今年以來歐美市場唔少有雙位數升幅，但港股原地踏步不特止，國指仲見緊紅，隨住愈來愈近第一季季結，多少會吸引到捧落後基金買嘢，前晚美股高位回落，尋日A股一度跌近2%，恒指先跌後回升，有59點進帳，收報22,311點，重返10日線樓上，三月恒指累積跌緊3.1%或者709點，本來三月業績期之後市況往往轉淡，今年會唔會例外？睇內地政經形勢，兩會後有穩定落嚟迹象，無疑中國的股市及經濟周期，下一波似乎係向上而唔係向下，加埋日本央行四月好可能開始無限量寬，留意到近兩日港匯開始轉強，四月實在唔應該睇得太淡。

對於高估值股份，分析員往往拎住放大鏡去睇業績。記得月初已提過要小心內地食品股，原因係估值已經好高，炒落機會高過炒上。事實旺旺（00151）業績，已反映原材料成本下降的好處，今年應該好難再咁明顯，業績後抽升一日之後，股價在11.5元升唔上跌唔落，同樣是基金鍾愛的食品股統一（00220）就無咁好彩，中午出業績賺8.56億元人民幣，升1.7倍，股價大跌14.7%或者1.49元，收8.59元，幾乎一次過將今年升幅清袋。

統一估值仍然偏貴

統一業績比大行估計的9.03億（人民幣．下同），低5.2%，不過應該唔係隊到開巷主因，一如同業，期內毛利率由29.1%升至34.6%，是○九年以來最高，不過同上半年比只係持平，未有進一步擴闊，但期內銷售推廣及行政開支升幅分別有40.7%及31.7%，均高於同期26.4%的銷售額增長，如果毛利率見頂的話，今年增長有可能放緩到20%左右，即使尋日隊完，但29倍的市盈率，感覺仲係有啲貴。

預咗見紅嘅國美（00493），蝕5.96億，減去上半年虧損5.01億，下半年蝕少好多，唔夠1億元。相比競爭對手A股蘇寧，去年銷售額尚有4%增長（國美跌20%），少賺44%，國美重整傳統店舖銷售以及大力投入電子商貿，代價沉重。數據上，現金、存款及應收帳都有所改善，但可見的日子，內地網購日趨普及，對暫時仲有九成以上銷售經由傳統「電器舖」賣給顧客的國美，負面影響相信仲會持續多一段時間，逆轉故事可賭，但唔適合孤注一擲。

兩隻內地奶粉股業績對辦，合生元（01112）多賺40.9%至7.43億元。雅士利（01230）賺4.69億，升53%，末期息由去年5.68分大幅提升99%至11.31分，現價2.68港元，相當於5.26厘股息。今年累積升75.6%及31.3%，跑贏大市。內地微調一孩政策，長遠對中大型奶粉股有利，早前雅士利見過3.16港元高位後，輾轉回落，同奶粉原料價可能上漲有關。除咗女人錢外，父母錢都算係最易賺，相信上漲的成本唔難轉嫁買家，績後企穩，可以再諗上車。