股海實戰：恒安 候70元邊收集

尋日藍籌股中最靚仔嘅係騰訊（00700）同恒地（00012），前者本月累計跌幅最多達16%，暫宜看待成超賣下嘅反彈；後者去年業績符預期兼送紅股，且市場盛傳大股東快落實捐農地一事而獲投資者睇好。不過，阿莊對今年本港地產市場表現持審慎看法，且認為投資者應開始注意息口回升嘅風險因素，故中長線投資寧選優質中資股。

光伏股繼續捱沽，另有迹象顯示資金流出汽車股，東風（00489）及長城汽車（02333）股價分別跌3%及4%，吉利汽車（00175）跌2%，而阿莊持有嘅新晨動力（01148）真係唔多夠動力，一度回落至招股價2.23元，收報2.27元，跌3.4%，睇嚟隻股冇咁快開車，無奈要再坐一會。

統一有下調壓力

講番業績股，尋日見統一（00220）派完成績表後遭洗倉，股價飛插近15%，收報8.59元，成交4.07億元。去年公司純利按年升1.7倍至8.56億元人仔，較市場平均預計嘅8.8億元人仔遜色，與去年上半年純利5.04億人仔比較，可見下半年經營表現遜於上半年；全年計毛利率為34.6%，比對中期數字則持平。相信現價估值有下調壓力，短期股價或要下試250日線8.16元支持。

另一隻消費股恒安（01044）亦派成績表，去年度收入按年僅增8.6%至185億元，但純利增長32.8%至35.18億元，毛利率上升5個百分點至44.9%，每股盈利（攤薄）2.861元，全年派息每股1.7元，按年增約26%。以尋日收市價76.7元計，市盈率降至26倍，息率增至2.2厘，相比其他消費股，估值唔算好貴。

事實上，以恒安目前嘅營運規模，去年收入、盈利及毛利率所實現嘅增長實屬難得，值得留意嘅係去年度負債比率上升，存貨增30%，增幅高於收入增長，但公司處淨現金狀況，且增派息，料有助減輕疑慮。展望今年，整體衞生用品市場需求保持穩增，公司將繼續透過擴大產銷規模嘅效益維持競爭優勢，較大變數在於今年原材料石油化工產品及絨毛木漿價格變化。

綜合大市走勢，入市策略宜待回試70元邊承接再分注收集，以一三年預測市盈率25倍計算，目標價可定喺83元，前年底以來嘅重要支持喺67至68元水平，不宜有失。