樓市出更：居屋百萬車位 唔怕辣

辣招「加辣」，全部非住宅物業都要畀雙倍印花稅，但有啲就算加稅照好賣。居屋富榮花園車位辣招後都賣102萬元，創全港居屋新高。另港島南貝沙灣尋日拍賣兩批共24個電單車位，其中一批每個售價低見約1.1萬元，獲同一組買家一口氣以30萬元投得全部車位，睇嚟車位仲有水位。

劉Sir睇到土地註冊處紀錄，富榮花園有個M層單號車位，喺今個月中登記賣咗成102萬元，而原業主購入價喺九八年大約50萬元。如果要畀埋雙倍印花稅嘅話，要再畀多1.53萬元；而香港居屋車位價從未試過突破100萬元，對上最高紀錄，喺去年年底，同一屋苑一個車位賣99萬元。

家天下黎振傑話，富榮花園依家都有成30至40個車位放盤，叫價最平都要70萬元，有啲係地下嘅靚位，叫「天價」成120萬至130萬元，而車位月租平均2,500元，而地下車位就要大約3,200至3,500元。

貝沙電單車位減價20%

其實加稅後車位繼續賣，貝沙灣發展商透過私人拍賣行減價「翻叮」嘅兩批貝沙灣電單車位，每批綑綁式拍賣12個，由環亞拍賣開拍，開價比之前減近兩成，分別開價13萬同15萬元，即吸引同一組買家先後以「一口價」13萬元及搶至17萬全數購入，平均每個約1.08萬同1.42萬元，屬呢類物業近期拍賣價新低。

農地獲搶高 銀主盤無市

另外，近年好受歡迎嘅農地，尋日都賣到一幅。黃開基拍賣行推出嘅元朗農地，被搶高至182萬元沽，土地面積約7,841方呎，平均呎價約232元。但尋日兩場拍賣共約7個住宅銀主盤，全部未到價或者未獲承價被收番，當中包括沙田名家匯連車位，同開價千萬嘅紅磡黃埔花園單位。

除咗車位，減價100萬以2,600萬元由環亞開價再拍嘅赤柱大街單號全幢，一度競價至2,650萬元未到價收番，但一組有興趣買家仍願追價，業主即場調升至2,668萬元再拍，並即獲承價沽出，呎價近2.7萬元。