魚缸Blogger：綠城中國 佳績支持

一個星期之前推介過嘅融創中國（01918）， 股價止跌回升，發力重返5蚊樓上，尋日升多6.1%，收報5.68元，累積升幅18%，當時提過佢同綠城中國（03900）斥90億元人仔買上海黃埔區商住項目，呢個朋友仔尋日亦都好有睇頭，飆逾一成，以13.5元收市，睇嚟負面消息反映得七七八八，可以關注吓。

內地住房需求強勁

睇番尋日爆上原因，綠城啱啱派成績表，去年多賺近九成至48.5億元人仔，收入升逾六成至353億元人仔，淨負債比率由148.7%降至49%，全靠去年引入九倉（00004）做策略投資者，同埋向融創轉讓項目及成立合營，令公司多咗現金去還債。至於期內實現合約銷售金額546億元人仔，除已超額完成全年目標（400億元人仔）外，亦都多過前年全年54%，而土地儲備項目合共96個，應佔權益建築面積2,258萬平方米，足夠未來五年發展。另績後瑞銀出報告叫人買，話佢業績好過預期、負債比率急降，畀佢目標價17.1元。內地住房剛性需求強勁，綠城Beta高兼前景佳，唔大貪先睇15蚊。

綠城中國（03900）

阻力位：15.00元

支持位：12.23元