期指攻略：大市料見底續持好倉

塞浦路斯財困問題最終有驚無險，昨日恒指升135點，收報22,251點，但建行（00939）及中海油（00883）因為業績分別抽升2.27%及4.19%，貢獻指數接近70點，相當於港股昨日超過一半升幅，反映實則市況依然疲弱。

昨日現貨成交唔配合之外，就連沽空佔大市成交亦見進一步萎縮，由上周五的8.13%跌到去7.37%，是二月初以來最低紀錄，仲有三個交易日基金季結，看來大戶大都抱一動不如一靜心態，等三月底四月初長假返來，才重新部署。

昨日恒指即市曾經見過22,351點，之後回頭，剛好壓在10日線22,357點樓下，事實上，如果睇番過去幾日大市走勢，上周一急挫449點後，六個交易日港股在低位橫行，卻出了五支陰燭，反映唔少炒即市玩家，趁市靜，守住部分重要阻力位，逢高試淡，收市前賺幾十點就平倉。暫時，有六成信心港股短期已經見底，22,185點開的好倉，繼以21,922點為止蝕，短期目標22,581點暫時不變。