有利有幣：英鎊短線或再挾淡倉

上周塞浦路斯出事後，英國財長歐思邦忽然現身「抽水」，話如果英國好像塞浦路斯咁無辦法向世界證明國家有能力償付，市場信心就會崩潰，所以英國有必要堅持緊縮政策。

英國二月份通脹按年升至九個月高位2.8%，連續三年高於英倫銀行所能容忍的2%上限，市場預期隨着英鎊連跌兩個月，遲些通脹將進一步升溫，不過財政預算案入面英國政府未有放寬2%目標通脹上限，換言之未來加推量化寬鬆的障礙就提高很多。

再睇番英國上年除第三季因奧運效應令GDP經濟出現正增長，上年其餘三季都係負增長，滯脹格局愈來愈明顯，而英倫銀行會議紀錄公布，投票結果同上次一樣維持6-3不變，而重要一點係大部分委員認為量寬令英鎊貶值過度，而持續貶值就會推升通脹，唔使好耐通脹又會升至3%。

技術上，上周突破重要阻力1.5250，短線將可能再挾淡倉，有機會衝上1.5350至1.54水平，不過大方向都仍舊向下，相信大批淡友已經眼定定望住1.55水平，隨時準備再做淡英鎊，因此短線博英鎊反彈仍需要驚住嚟炒、炒住嚟驚，寧願等有無機會挾上才再沽英鎊。