Fundman睇市：中動向 勝在底子厚

塞浦路斯危機消除，傍晚所見，歐洲股市向上，美債價微跌，金價偏軟，證明上星期警鐘誤鳴，基金都係追番風險資產，但偏偏中國股市就係唔升，港股表面上有135點進帳，心水清的唔難發現，股份升跌比例51對49，相當均勢，恒指超過一半升幅來自兩隻業績超標完成的中海油（00883）及建行（00939）。

成交唔配合升勢，尋日得606億，比上星期平均695億少一截，沽空佔大市成交比例7.37%，跌到二月四日以來最低。仲有三日基金月結，會唔會趁市靜局挾倉順便做吓粉飾？外圍全部貼實高位發展，港股確實有咁條件，尤其A股都由上星期低位累積反彈4.2%，恒指彈得1.2%，落後到暈。

慷慨派息股受追捧

尋日見到精電（00710）宣布高派息比例，股價大升17%收市，引起筆者興趣。睇番過去一星期出業績公司，盈利派息比率高於五成，有50間。派息率高於一倍，亦有10間，包括中國織材（03778）、映美（02028）、順誠（00531）、香港建設（00190）、盈天（00570）、四環（00460）、銀建（00171）、和記港陸（00715）、天大油管（00839）及路訊通（00888），可惜這堆股票中，有唔少屬於業績基數較低，在管理層盡量維持派息下，令派息比率拉高。

若非上述因素，高比例派息仲有可能是本身業務平平穩穩，有高現金流，兼且在可見未來無重要資本性開支，故減少保留現金，高息股五十強，和記港陸及和電（00215）就正係長和系兩大現金牛，派息率分別108%及74.9%，往績保持七成以上派息紀錄的卓悅（00653）及寧滬高速（00177），今年維持水準，派出盈利85%及74.3%。

上星期，中國動向（03818）末期送特別息，加埋一共派1分人民幣，以過蚊股價，稱唔上高息，但派息比率都有69.3%，皆因業績麻麻。業績後，意外地股價由1.04元升至尋日最高1.3元，累積升25%。

由成績表睇，集團一如其他積極消化市場積累存貨的體育用品品牌，期內銷售額跌35.4%，至17.72億（人民幣．下同），毛利率收窄7.5個百分點至47.5%，純利升73.5%至1.76億，實際營業盈利急跌三成，至6,917萬。業績勁升，純粹因為利息及金融收益大升41%至1.83億元。

中動向○七年上市後，股價深潛，不過，集資及滾存多年的60億現金及金融資產，等於每股1.08元，換算後比現價1.26港元高7%，成為抗跌護身符，連埋特別息派一年先洗1.23億，意味只係由銀行收息，轉交畀小股東。再睇存貨及應收帳比一年前減少26.2%，相對銷售額，很難說最壞日子是否已過，不過底子極厚，暫時也見唔到坐食山崩風險，自問超級有耐性兼專攻平貨的，或可等回吐至1.2港元樓下郁手。