股海實戰：金風一浪高於一浪

雖然塞浦路斯危機化險為夷，但尋日港股表現平淡，恒指波幅僅150點，成交得606億元。若然嚟緊兩日都係咁淡靜，指數波幅細買賣輪證蝕章，更要提防周四長假前交易日有大戶乘機挾倉順道做埋季結，故周內還是盡量避免沾手指數輪證，集中火力精選業績股短打，大動作等長假完結後再作部署。

業績股成市場焦點，受業績略勝預期帶動，內銀股建行（00939）升2.2%、重農行（03618）升4%。內房股綠城中國（03900）及奧園（03883）亦分別升10%及9%。此外，派送紅股嘅中石化（00386）股價一度突破9元關，高見9.1元，收報8.99元，升2.7%。嚟緊尚會有多家藍籌及中資股派成績表，可順勢而為，喺當中尋找明日之「升」﹗

光伏股後勁不繼

上周股價偏強嘅家電股尋日回軟，反而有傳下月內地燃氣大幅漲價，個別燃氣股有追捧，北控（00392）同新奧（02688）都分別創出五十二周新高。新能源股中，上周現反彈的光伏股後勁不繼，保利協鑫（03800）及興業（00750）分別跌6%及5%，反觀個別風電股接力向上，金風（02208）升5%，華能新能源（00958）遭配股後依然硬淨，尋日創五十二周高位2.32元，收報2.26元，升3.2%。

不妨留意，「風強太陽弱」會否成為短期投資趨勢。講到風電股，金風上周宣布去年度業績，一如預期，純利顯著倒退74%至1.53億元人民幣，需留意嘅係，業績披露咗今年首季度經營數據，淨利潤同比增400至450%，去到介乎3,088萬至3,397萬元人民幣，主要受惠去年度比較基數較低，且公司優化管理，提升效益。

金風股價由一○年高位21.8元，回落至去年低位僅2.41元，累跌88%，充分體現行業周期盛衰，唔單只散戶受創，唔少基金經理一提起就心傷。如今市場基本上認同今年風電設備行業將較去年有改善，故見過去大半年金風嘅股價由低位回升，年內能否進一步回揚，還看行業復甦進度。

早前發改委將「海上風電機組技術開發與設備製造」及「海上風電場場建設與設備製造」兩項新增入新能源目錄，料有助帶動需求。入市策略方面，參考近半年股價一直沿50日線向上，現價未宜急追，候回落至接近50日線（現處4.15元）才分注吸納，依照一浪高於一浪嘅走勢推斷，下一個浪頂喺5.4至5.5元區域，4元關不宜有失。