魚缸Blogger：金蝶國際可追落後

一月推介過嘅金蝶國際（00268），仲以為全年業績見紅的預期已反映晒，點知之後佢畀富達減持，近兩個月股價好似食咗瀉藥咁，不過公司前晚公布業績前，被偷步炒起，仲連升兩日，尋日逆市升多5.4%，以近全日高位1.36元收市，兩支大陽燭撐住，不妨跟炒一轉，博佢踢上個半。

金蝶業務包括企業管理軟件及服務、企業互聯網服務等，截至去年底止收入下跌12.7%，至17.6億元人仔，盈轉虧蝕1.4億元人仔，前年則賺1.44億元人仔，原因係期內全球經濟不振，中小企客戶減少軟件開支，不過下半年業績已比上半年（虧損2.1億元人仔）有所改善。

另公司持續「雲+端」戰略轉型，用「雲管理，觸手可及」做主題，發布咗一系列中小企業雲管理產品，並積極推動企業社交網絡、SaaS等新興服務，有助提升市場份額。隨住內地經濟復甦，今年佢嘅盈利料有改善，後市應該仲有追落後空間。

金蝶國際（00268）

阻力位：1.50元

支持位：1.29元