股海實戰：滬杭甬 中長線吸納

聯儲局議息聲明叫人放心，滙豐內地三月PMI數據符預期，但被人行正回購消息抵銷，恒指反彈過後轉窄幅上落，埋單跌30點，收報22,225點，成交回落至650億元。短線博反彈唔好大貪，有胡要識食，最好即日埋單，唔使驚瞓醒啲股票走晒樣！

去年末季A股ETF風頭一時無兩， 不過，春節後A股回落，本地中資股更遭輪流洗倉，A股ETF基金規模縮水，基金價格亦由過去多數較資產有溢價，演變成有折讓。以本周三收市價計，華夏滬深三百（83188）、易方達中一百（83100）、嘉實明晟A股（83118）及恒生富時中國25（02838）折讓率介乎0.06至0.53%。投資者對投資A股產品由熱轉冷，可見一斑。

A股前景毋須悲觀

雖然如此，但阿莊相信，咁嘅表現係班游資走咗去炒美股及日股，炒到咁上下又會回流中國股票，故暫毋須對A股以及中資股前景過於悲觀。畢竟，今年中國GDP增長目標係7.5%，阿爺講得出口嘅應該唔會有閃失，咁即係話衰極都有個譜，調控到咁上下又會鬆番手。以平常心看待調整市，唔想食驚風散，可以減少短炒，保留實力，耐心等候心儀實力股技術指標出現極度超賣時入場掃貨。

陸續有中企發布業績，其中滬杭甬（00576）去年純利同比跌6.6%至16.8億元人仔，全年派息按年降3%至30分人民幣。年內通行費業務、服務區及廣告業務嘅貢獻略跌，但跌幅有限，反而證券業務經營溢利受去年A股不振影響而跌44%。

不過，A股已由去年低位回升，相信今年證券相關業務貢獻可持續改善；至於公路業務，據聞今年以來經營表現符預期，剛宣布增持甬金高速至全資擁有，另擬發行十億人仔債券，下半年嘉紹高速開通，對旗下整體公路業務影響中性，前景展望穩定。咁亦即係話，如無意外，今年業績可勝去年。

老實講，目前魚缸中能找到一家同時涉獵江浙地區交通運輸同金融證券業務嘅股份絕無僅有。滬杭甬旗下浙商證券已申請在上海A股上市，其證券業務資產價值向被低估，相信一旦落實分拆計劃，估值有上調空間。走勢上，股價喺5.8至6元有不俗承接，今轉調整若回落至該水平可考慮作中長線吸納，加上可坐收逾五厘息，兼享A股復甦機遇，攻守兼備，值得多望兩眼。