樓市出更：入伙盤谷租 劈3成有客

轉賣為租成為近期業主嘅避難所，但隨着租盤增多，租金都受壓。好似舊年年尾入伙嘅大坑尚巒，今個月已錄到約16宗租務成交，比上個月全月多約一倍，由於租盤升到約60個，所以最近有業主勁劈租逾三成，以實用呎租約42元租出咗個高層單位，低市價約15%。

買賣樓市轉淡，中原林龍南同劉Sir講，唔少尚巒業主見售價仍未到意向，最近都寧願轉租，令租盤增加到約60個，雖然成功帶動今個月租務成交去到約16宗，比上個月全月增約1倍，但租金就同時受壓，好似有個高層A室，建築/實用面積545/404方呎，業主原意向放售，租金叫價2.5萬元，近日終減至月租1.7萬元租出，減幅約32%，建築/實用呎租約31.2/42.1元，低市價約15%。

上班族1.2萬租景怡峯

香港置業方文偉話，景怡峯近期陸續入伙，一下子令市場租盤急增，唔少業主都願意減500至600元吸客。啱啱有個上班族以約1.16萬元租咗個高層E室山景單位，建築/實用面積約370/270方呎，建築/實用呎租約31.4/43元，比起現時同類高層單位叫租約1.25萬至1.3萬元，租金約莫低一成。

唔少屋苑都錄到低租或減租個案。該行鄒岳殷表示，鑽石山居屋龍蟠苑D座中層1室，由於租客願繳付一年租金，業主亦肯每月減租1,500元，終以月租約1萬元租出，建築/實用面積480/353方呎，建築/實用呎租20.8/28.3元。

映灣租務成交多33%

美聯林智明講，土瓜灣翔龍灣6座高層C室業主以低市價放租單位，成功喺放租數日，就搵到租客以約2.6萬元承接，建築/實用呎租約21/29元，相比現時同類單位建築呎租超過23元吸引。

此外，中原陳繼成話，東涌映灣園今個月租務成交已經去到40宗，比上個月全月多咗33%，由於租務放盤比出招前多咗約15至20%，所以租金已見壓力，平均實用呎租跌咗4%至23元。