Fundman睇市：光大國際睇高一線

儘管塞國政府讓步，將細額存戶的稅率降低，但提案前晚仍大比例下不獲通過。不過，俄國總統普京可能向塞國提供援助，事關其銀行體系的700億美元存款中，有近300億美元來自俄羅斯，變相被挾持財產唔幫唔得。再者，經歷去年救助希臘的經驗，大家心中有數，亦都睇死歐洲央行冇符，就算歐盟窮兄弟再賴皮，佢都係唔會踢佢出局，最後只有乖乖出嚟埋單，塞浦路斯危機最多只不過係一次基金震倉演習。

被中港股民視為神級技術分析師的Tom Demark，前晚出嚟唱A股見底，加埋大摩分析員預測，恒指最樂觀一五年可見5萬點！港股氣氛一百八十度轉變，恒指升214點，儘管沽空佔大市成交比例升至12.15%，係去年八月底以來最勁，不過三月期指成交大增，估計同淡友收夠籌，開始冚倉有關。

恒指見五萬話難唔難

大摩睇港股見5萬點的亞洲策略報告，內容其實無大新意，股市反應咁大，皆因本身已超賣到極，市場只係等一個買入訊號。報告理據主要圍繞中國經濟增長、恒指周期每六至八年出現一次高位的特質、以及歷史估值，去預測港股一五年底前可以去到38,800至50,000點。

本文曾提過，過去二十年港股市帳率介乎1至3.5倍間運行，平均及中位值分別係1.9及1.88倍，以恒指22,256點計，相當於1.46倍市帳率，屬一個中游至偏低水平內，套用九三、九九及○七年高位的3.3至3.5倍，以歷史估值推算，恒指下次高峰升至50,304至53,353點的機會的確存在，問題是未來兩年要什麼催化劑，令股市能夠重演上述三次的超級牛市。

兩會期間，中央用了相當篇幅提出環保改善工程，其實早在「十二五」規劃，國家已提出要扶持垃圾處理行業，港股中最具規模兼且有番咁上下往績支持的只有光大國際（00257）。早前大市下跌，光國股價跌幅遠比其他兩會概念股輕微，上星期已率先由低位反彈，昨收報5.47元，升0.17元。

光國去年賺11.23億元，撇除出售青洲大橋收益，實際核心盈利8.81億，相對220億市值，或有保守投資者嫌貴，事實目前光國唔少項目仍在籌備及建造階段，但隨濟南、蘇州、鎮江與宿遷項目投產，利用率改善，未來兩三年業績增長可期。今次兩會，講到底多少有反高潮味道，唔少概念股唔對辦，但能喺弱市中跌唔落，光國睇嚟後市可睇高一線。