股海實戰：瑞聲科技吼位上車

內地股市回穩，滬綜指重上2,300點樓上收市，恒指亦乘機收復22,200點，收報22,256點，升214點，成交額764億元。阿莊傾向視為反彈市，總之恒指必須企穩喺22,000至22,100點水平樓上始能言喘穩，一旦再以大成交失守該水平，就要考慮離場觀望。

大摩話恒指二○一五年恒指最樂觀可見50,000點，今年最牛可見32,000點（相等於市盈率14.4倍），最差可見15,200點（相等於市盈率9.2倍），基本預測則為25,600點（相等於市盈率12.5倍）。

老實講，今日唔知聽日事，咁快講二○一五年預測真係得啖笑﹗至於今年，阿莊認為其預測範圍可作參考，但當然，指數升跌係一回事，有冇揀啱股份亦十分之重要，只要睇中潛質股，唔使日日炒出炒入，睇準時機入市坐定定，一年入市三、兩次，投資回報可以跑贏大市。

比亞迪業績料改善

尋日按計劃以均價2.39元，買入15萬股新晨（01148）。此外，上周五曾誤傳批新股集資嘅比亞迪（01211）尋日作出反彈，收報25.7元，升9%。公司將於本周五宣布業績，業績公布後若然真係傳來集資消息，阿莊亦不感意外，畢竟公司處投資期，今年業績有望改善，集資規模唔係太大嘅話，應該唔難搵捧場客。

再睇下手機股，最近三星推新手機，聽聞蘋果公司亦密鑼緊鼓，不排除iPhone5S將會喺年中推出。雖然呢兩年「果瘋」經已冇咁厲害，但若然新iPhone產品會喺年中推出，估計相關零部件採購會喺三、四月開始，此前可留意相關概念股。

主要生產iPhone微型喇叭嘅瑞聲科技（02018），今年以來股價最多累升約24%，即使以尋日收市價32.1計，累升幅度亦有18%，表現跑贏大市。

該股將於下周二宣布末期業績，現價一二年及一三年預測市盈率分別為二十二倍及十八倍。論估值，現價吸引力屬中性，回落至28至30元區域才入市吸納會較值博，上升通道底部支持喺26至27元水平，向上可以參考高盛上月新修訂嘅目標價37元。反正依家唔係爭住去買股票嘅時候，唔爭在等埋份業績再定奪。