樓市出更：揾客頂租 環貿又兩層

歐債問題時好時壞，備受財金機構追捧嘅九龍站環球貿易廣場（ICC）超甲級寫字樓，再傳出有財金機構租客搵人頂租，最新聽到嘅係兩層高層全層單位，租期仲有幾年，依家租客以意向呎租大約85元推出頂租。

雖然政府雙倍印花稅打窒寫字樓買賣，但好彩甲級寫字樓租賃仲有用家支持，聽講出招後有啲代理行寫字樓租賃成交，佔佢哋部門生意最少九成，比例同之前比多一倍，部分成交更高出業主意向。

有代理同劉Sir講，啱啱聽到上述環球貿易廣場兩層搵客頂租，面積加埋大約7萬方呎，現租客淨係租緊呢兩層，可能想慳錢，將部門縮返去中區，依家搵定頂租啦。其實今年初已經有一間租用該廈兩層高層樓面嘅財金機構都搵頂租，面積同意向租金都同今次差唔多。

事實上，出招後甲級寫字樓租賃逆市旺，美聯工商舖（00459）行政總裁黃漢成話，辣招後，該行寫字樓部亦作出應變，積極向租賃市場埋手，估計過去近一個月，佢哋寫字樓部門生意達約九成嚟自租賃，並將寫字樓全年租金升幅預測由10至15%，增加至12至18%。

上環乙廈劈價15%沽

寫字樓租賃逆市旺，劉Sir收到風，金鐘力寶中心2座有個中層戶，半年多前已放租，業主叫租每月大約6.24萬元，呎租大約48元，早幾日有企業睇完後，擔心該廈放租盤業主加租，即刻同代理講快啲傾租，業主都醒，見勢少少地每方呎加租一元，租客唔想夜長夢多，兩日後即以每月約6.37萬元承租，呎租約49元。

不過，乙級寫字樓有業主要減價賣出，消息稱，上環一洲大廈低層減價一成半後，以約1,400多萬元售出。

尖沙咀酒店嗌40億

消息話荃灣「劏舖」荃立方重售80個舖位，業主提供釐印等優惠。

而依家搞緊改裝工程嘅銅鑼灣時代廣場前戲院租用嘅地下同低層部分，有接近九倉（00004）消息人士指，上址地下及二樓新舖位悉數簽訂租約。市傳有大型零售品牌放棄洽租上址部分樓面，佢回應話並無此事。

另外，有老友話尖沙咀有幢酒店放盤，叫價超過40億，劉Sir相信係近年最大宗酒店放盤。