SUN勢力：安東油服 具值博率

昨日成千隻股票下跌，42隻股票創五十二周新低，氣氛認真麻麻。上周四恒指反彈，當日本欄已提醒大家唔好心急撈貨，好容易贏粒糖輸間廠，結果恒指尋日一度跌穿二萬二。後市變數多，做淡一樣好易中招，至怕被人摑兩巴。

由一隻唔多起眼變身為股王之一的安東油服（03337），去年營業收入增長59%，純利大增2.9倍，表現好過預期，多間券商如野村、巴克萊都給予「買入」評級，最高睇6元目標價。只是「生不逢時」，撞正大跌市，股價昨跌3.8%。由上次恒指高位23,944點計，現回吐約8%，有機會出現超賣反彈，只要大市喘穩，安東股價亦有望回復動力。

安東一直被視為頁岩氣概念股，因而獲得美國油田服務公司Schlumberger入股，但內地頁岩氣屬起步階段，其管理層亦話未來一兩年都唔望頁岩氣會帶來甚麼實質貢獻，故近期頁岩氣股被狂質的時候，安東幾乎無調整過，最大的原因是內地天然氣進入旺盛開發期，帶動具技術的油田開發公司業務，安東去年反映盈利質素的各項指標都取得唔錯表現。既然內地「個餅」愈來愈大，今年集中火力在內地市場，不排除未來有更多中標消息，以支持股價。

安東油服（03337）

阻力位：5.5元

支持位：4.1元