Fundman睇市：港股 乏反彈動力

尋日之前，未知多少投資者對塞浦路斯有認識，筆者印象中，塞國鄰近希臘，仲有個每次比賽都掀動觀眾情緒，火爆型天才網球手巴達迪斯（Marcos Baghdatis），仲知道人口大約係香港七分之一，再數落去，才疏學淺的筆者，已無貨賣。

巴達迪斯排名唔高，但試過發老脾一場波打爛四塊球拍，成為新聞，估唔到塞浦路斯政府一樣咁激，史無前例，向銀行存戶徵收存款稅，為的是區區76億美元。試想像有晚政府突然要求銀行限制匯走資金，同時向存戶撳住搶，徵收3至15%存款額作稅金（視乎資金大小而定，提議中超過50萬歐元徵收15%！），真係唔擠提就有鬼。尋日消息一出，塞國人群情洶湧之外，最大反應係俄羅斯總統普京，強烈譴責塞浦路斯政府，皆因塞浦路斯銀行體系的700億歐元存款之中，大約有120億歐元來自俄羅斯銀行業及國民，一旦挾硬嚟，俄羅斯無端端要畀15億歐元買路錢，唔嬲有鬼。

近期個市確係兇險，上星期二、三恒指狠狠插穿10日及20日線之後，周四先跌後倒升幾十點，以為市況喘定，估唔到上周五同本周一先至見真章，塞浦路斯引發新一輪歐豬危機，被淡友充分利用，尋日港股一跌到底，反彈乏力，恒指埋單跌449點，報22,083點，沽空佔大市成交由10.37%進一步升至10.79%。沽家沽得咁狠，一來之前炒兩會前後有利好經濟政策出台，最後除了一孩政策相關股份炒過一浸之外，全部都唔多對辦，好似光伏股盛傳中的補貼額就奀到暈，光伏股由天堂跌落地獄。

個別中資電力股逆市靠穩，其中華潤電力（00836）升3.7%，收報20.95元；華能國際（00902）升1.05%，收報7.68元。事實上，在內地經濟保持穩定增長之下，電力需求可望維持穩定，電力股收益相對穩健。大型電企在傳統火電業務具規模效益、發展新能源業務亦具優勢，排除煤價大升的可能，電力股是眾多中資股板塊中相對穩陣的選擇。

水泥股可酌量買貨

內房股今浪最早見頂，一月中左右大都開始高位回落，之後利淡的消息不絕，例如人行正回購擺出收水姿態、兩會前重申中國對調控樓市的決心、再來就是流傳深圳推出完全令人摸不着頭腦，唔准發展商加推加價的「限漲令」傳聞，上星期則再來海沙建屋的消息。

既然放得入口的食物安全都未搞掂，筆者對建材質量出問題並唔感到太過意外，不過消息都似衝着內房企業而來，睇落又唔係巧合咁簡單，領導輪替塵埃落定，說不定有更多壓抑樓價措施出台。

大跌市中，部分早行一步的內房，低位有盤博吓反彈，其中以方興（00817）升2.5%，華潤置地（01109）升2.1%最標青，兩隻股票由一月高位分別跌21及23%，可惜一日中央未正式出手，壓抑樓市的陰霾一日未除，只適合身手敏捷兼貼市嘅股民博短線反彈。對比之下，水泥股今年受惠更多保障房及基建落實興建，過去兩日見基金洗得相當狠，如果有條件分注入市的，或者可以酌量開始買吓。