期指攻略：市況反覆嚴控注碼

受富時指數成分股變動影響，上周五港股成交明顯增加，可是市況卻反覆之極，恒指即市見過22,799點，剛好觸及短線跌浪23,262至22,305點的0.5反彈阻力22,783點之後，淡友站穩陣腳，午後藉A股升幅收窄，大市級級落，最低見22,494點。

近期留意到幾次即市高開低收，都係有無厘頭傳聞累事，上周五就傳比亞迪（01211）巨額批股，儘管公司作出澄清，不過大部分投資者在經過一、二月的震倉後，普遍有唔明朗環境揸現金的心態，些少風吹草動，淡友便能如取如攜。

上周五，建議期指開市低於22,580點可以試買，結果開22,636點，全日得個睇字，即市高位22,720點，同訂下的超短線反彈目標22,721點，只相差1點。

上周五先高後低走勢（唔少二、三線有如小股災一樣），即使未完全破壞上星期四的反彈，但再挾高的氣勢已失，一日期指及國期唔返回上周跌市0.5反彈阻力樓上，即22,733及11,234點前，唔值得揸貨過夜。筆者認為，今浪最難評估，仲係中港股市大弱勢，完全漠視外圍升市，發展落去，會係歐美日股掉頭，對中港股市踩多兩腳，抑或沽多一浪，嚴重超賣後好友挾上追回外圍升幅？有明確訊號前，即市務必要訂止蝕兼且嚴控入市注碼。