SUN勢力：比亞迪 博技術反彈

上周五深圳爆出「鹹水樓」事件，話起樓用的混凝土溝入海沙，牽連到華潤置地（01109），華潤水泥（01313）及其他內房，股價齊插，究竟影響有幾大，相信事件無咁快完，會否繼續發酵，要視乎官方態度。

另一單同樣矚目的消息，是突然傳來比亞迪股份（01211）配股，尾市時彭博閃出比亞迪要配售相當於H股兩成股份，集資約41.7億的報道，令股價短短二十分鐘內急挫，埋單跌7.8%，反應非常驚嚇。不過，公司深圳發言人於收市後澄清，否認傳聞。大家定過神來後，發現比亞迪董事會將於本周五審議業績，屬blackout時間，理論上唔會有配股活動。

業績已在預期之內

比亞迪是一間充滿變數的公司，早前已公布按中國會計準則的業績，盈利大跌94%，但當日股價都係跌幾毫子，反應不及配股消息來得強烈，反映其業績已屬預期之內，若非再有特別驚嚇，股價再大跌空間唔會太大。

內地今年將力谷環保能源車，比亞迪似肩負重任，有一定概念，但概念炒唔炒得起都係後話，短線可先博其「失驚無神」急跌後的技術反彈，採快上快落策略。

比亞迪（01211）

阻力位：31.4元

支持位：22.8元