股海實戰：新晨動力 非池中物

上周港股表現反覆，中資股同本地地產股都彈唔起。展望本周，恒指向上重大阻力喺23,000至23,200點，向下較大支持喺22,000至22,100點，現水平唔值博，最好等見到大方向出現先至好有大動作。

上周五係一年一度嘅「三一五」（國際消費者權益日），此前包括官方媒體積極發掘黑色消費品題材，涉及汽車、餐飲、衣服及建築等行業，其中有關海砂起樓嘅報道震散建材股，捲入風波嘅潤置（01109）及潤泥（01313）股價跌4至5%，同類股中建材（03323）、海螺（00914）亦跌5至6%。連有全國性品牌嘅大型發展商都捲入問題用料事件，其他由地方企業起嘅樓宇質量真係難以想像。一日未搞清楚事件，暫時就當可以睇少一瓣股份好了﹗

京能可睇位食胡

上周五阿莊提及嘅中燃（00384），臨收市前兩分鐘股價急挫一成，唔排除同城中基金主要參考指數更變成分股有關。好在阿莊文中講到明現價某程度已反映樂觀情緒，冇平貨喺手宜注意風險。手頭尚持有嘅京能（00579）由即市高位2.52元掟番落2.3元收市，呢浪好似差唔多，本周會睇位食胡；石藥（01093）上周五停牌，唔排除關於維C業務嘅利淡消息，但相信影響短暫，暫會繼續持有。

新股靄華押業（01319）上周五曾高見1.48元，尾市回落至1.38元收市。喺上周三首日掛牌嘅新晨汽車（01148），繼上周四重上水面後（招股價2.23元），上周五更一度飆升至2.42元，惜尾市不敵淡風，回落至2.3元收市，升幅僅2.6%，成交1.63億元。

新晨乃華晨（01114）分拆出來從事製銷嘅輕型汽油及柴油機生產商，按銷量計為內地最大自主品牌小型客車發動機生產商。今次上市集資主要用作擴大產能及開發新產品。吸引阿莊留意嘅係，除華晨之外，其主要股東還包括白酒商五糧液。其實早喺○六年，華晨同五糧液已合作喺四川搞整車項目。知道呢個背景，對今時今日新晨嘅主要股東陣容應不感意外。

白酒股曾喺A股翻雲覆雨，呢個背景，令阿莊聯想到呢隻新晨亦非池中物。呢兩年多華晨嘅股價表現，會唔會成為未來新晨股價走勢嘅翻版，阿莊都係旁觀者，冇特別消息，只係感覺佢做自主品牌發動機做到咁大規模唔簡單，股東背景亦有特別之處，可關注其業務發展，並已納入觀察名單。