樓市出更：九肚地過萬蚊呎有難度

上個禮拜政府以過百億賣出何文田常樂街豪宅地皮，但係每方呎樓面地價只約1萬多元，同早前賣出嘅沙田九肚地差唔多，有測量師就將嚟緊禮拜五截標嘅九肚豪宅地估值，由原先估計每呎約1.05萬元，調低近一成至約9,500元，成交價由13.7億減到12.4億元，依家九肚地皮市場估值上限只係約13億元。

劉Sir知道，何文田常樂街豪宅地上星期成交樓面呎價約莫10,233元，比起一○年同區豪宅地呎價低咗超過18%，老友高緯環球張翹楚都話，上述沙田九肚第56A區B2地盤豪宅地，樓面呎價都未必做到一萬元，佢估計大約只係9,500元左右，最新估值約12.4億元，比起之前約13.7億元，減咗約9.5%。

信置永泰料再出手

綜合市場預測，呢幅豪宅地現時估計樓面呎價約9,000至1萬元，估值約11.7億至13億元，即係上限估值已經由約13.7億元，下跌約5%至約13億元。不過劉Sir相信，好似信置（00083）同埋永泰（00369）等喺區內「插咗旗」嘅財團，都會積極競投。

另外，同一日截標嘅前北角邨西面部分酒店地皮，總樓面約38.8萬方呎，當中酒店配套設施同埋零售樓面，就唔可以超過約15.5萬及3.88萬方呎。

北角酒店地估27億

雖然上周有幅東涌商業地以超出估值上限價逾四成售出，但業界都覺得係個別例子，所以未有測量師調整地皮估值，預計成交價約27.1億元，樓面呎價約7,000元。

韋堅信測量師行林晉超同劉Sir講，地皮係市區優質酒店地，作純酒店用途，所以類型同上個禮拜以高價售出嘅東涌商業地唔同，而北角區目前有唔少酒店營運緊，地皮做價高低取決於發展商取態；而幅地隔籬就係新地（00016）投得嘅前北角邨商住地；嗰住宅地皮去年成交價69.1億元，樓面呎價約9,347元。