Fundman睇市：電訊設備股有排賺

港股終於擺脫一連三日開得高收day low的劣勢，尋日恒指先跌後拗腰倒升62點，收22,619點，大市成交830億，係踏入三月以來最多，升市有晒成交配合。

中移（00941）業績稍勝預期，去年賺1,293億元（人民幣．下同），增長2.7%，較市場預期的1,250至1,260億高，主要因為第四季EBITDA利潤率向好，季內盈利359.95億元稍勝預期，按年升6.2%。末期息1.778元（港元．下同），全年派3.411元，盈利派息率43%，息率4.09厘。

內地4G發牌如箭在弦，中移唔用普及的HSPA，度身訂造「全球獨有」的國產4G制式TD-LTE，由上市的子公司獨資負責，看來已無懸念。業績中，中移透露今年資本開支1,902億元人民幣，比去年的1,274億元人民幣大幅提高49%，遠高於市場預期，有份分千億大餅的美國Qualcomm（美股代號︰qcom）及中興（00763）今次肯定飽到嘔，尋日後者股價抽升8.8%，連帶京信（02342）及中國無線（02369）都升8.5%及4.1%，未來幾個月，電訊股同電訊設備股之間點樣揀，睇怕都唔使多講喇。

繼滙控（00005）及渣打（02888）將新做按揭利率加四分之一厘後，尋日連恒生（00011）都宣布跟進。銀行加按息，初時筆者以為自己聽錯，過去半年政府連番出手打壓，令樓市成交萎縮，銀行唔爭生意不特止，仲加息趕客，聽幾個銀行大班解話，講來講去，都係資金成本上升，以及加強風險管理云云。

銀行加按息一箭雙鵰

香港根本資金氾濫，睇番一個月及三個月香港銀行同業拆息，由年初的0.277及0.398厘，跌到尋日分別報0.207及0.381厘，是去年歐債危機後新低，再睇金管局反映銀行資金成本的綜合利率（C rate），近半年變動唔大，一月份仲微跌至0.28厘，薄仔息根本冇郁過。今日要買大價樓或者第二間物業按揭，至多借四至五成，即係樓價要跌一半，銀行先入肉，住宅按揭向來係本地銀行最唔憂做又最賺錢嘅生意，按揭成數去到歷史新低，仲有幾大風險大家心知肚明。

講到底，今次加息政治象徵高於一切，本地銀行乘機拉闊息差，仲送埋個順水人情畀嚴打樓價的特區政府，何樂而不為？但到底穩穩陣陣買番本地銀行股，抑或博地產股反彈，留番畀大家自己決定。