股海實戰：中燃 長線坐九望十

吊頸都要抖抖氣！尋日恒指先插落全日低位22,305點，再藉中移（00941）業績略勝預期嘅消息，喺午後收復失地，收報22,619點，升62點，成交832億元。自上月下旬以來嘅22,400點水平支持總算守得住，但後市尚未許樂觀，暫只能看待成短線反彈。季結前未能重上50日線（現處23,206點）嘅話，後市向下機會仍高於向上。

上月中旬阿莊曾品評過隻天津發展（00882），指其可憧憬獲得注資。近日就有內地傳媒報道，天津市擬將天津醫藥注入津發。正所謂「空穴來風」，津發股價尋日即彈7%，收報6.36元，相信任何大動作都會喺三月廿七日業績公布後先至見光，想博好消息就要再坐一會。

跟炒津燃考定力

講到天津，據講內地五大電力集團現正聚首天津，擬大力發展該市天然氣發電項目。按天津市政府規劃，至一五年底該市將建成不少於五個天然氣發電項目。目前該市在建嘅天然氣發電項目為天津陳塘莊熱電廠，由天津津能投資負責實施煤改氣工程，料於明年首季全部建成。正正由於推動天然氣發電需要龐大資金，市場憧憬年內天津市政府將以天津津燃（01265）作為融資平台，向其注入資產。不過，該股股價今年以來由1.8元水平起步向上，至月初高見3.54元後引發獲利回吐，碌到落低位見2.69元，都幾驚嚇！係升浪告一段落，抑或喺業績公布前大震倉，考驗捧場客定力，就要做事後孔明！

北控增持惹揣測

講起燃氣股，尋日氣氛唔錯，潤燃（01193）創五十二周高位，中燃（00384）亦升4%。如今基金都在等候中燃落實與中石化（00386）戰略合作（包括組合營）嘅條款。上月底，北控集團喺場外以平均價6.74元增持中燃7,500萬股好倉，持股量由19.48%增至21.12%，惹來市場揣測此舉係要趕喺中燃向中石化批股前作出增持，以免持股量被攤薄。

中石化聯手新奧（02688）入主中燃嘅計劃告吹後，中燃能與中石化達成戰略合作，反映喺商場只有共同利益，冇永遠敵人！阿莊早喺中燃舊高層回朝，公司股價喺四個幾時，經已話其必有後着，可惜信心唔夠堅定被震走。班基金咁捧場，一來憧憬中燃落實與中石化合作後，旗下加氣站業務發展步伐可明顯提速，另亦唔排除日後中燃有機會同北控集團展開業務合作，順風順水，中長線股價可坐九望十。

但阿莊補充一句，基金股特色係股價升得快時跌也快，參與者食得鹹魚要抵得渴，畢竟現價估值某程度已反映樂觀睇法，若冇平貨喺手，高追宜注意風險。